ಟಿಕೆಟ್‌ ದರ ಏರಿಕೆ ಕೋಲ್ಕತಾದಲ್ಲಿ ನೀರಸ ಪ್ರತಿಕ್ರಿಯೆ

Team Udayavani, Sep 16, 2017, 7:40 AM IST

ಕೋಲ್ಕತಾ: ಕೋಲ್ಕತಾದ ಐತಿಹಾಸಿಕ “ಈಡನ್‌ ಗಾರ್ಡನ್ಸ್‌’ ವಿಶ್ವದ ಬೃಹತ್‌ ಕ್ರಿಕೆಟ್‌ ಸ್ಟೇಡಿಯಂಗಳಲ್ಲಿ ಒಂದು. ಇಲ್ಲಿ ಯಾವುದೇ ಅಂತಾರಾಷ್ಟ್ರೀಯ ಪಂದ್ಯ ನಡೆದರೂ ವೀಕ್ಷಕರು ಕಿಕ್ಕಿರಿದು ಜಮಾಯಿಸುತ್ತಾರೆ.

ಸೆ. 21ರಂದು ಭಾರತ-ಆಸ್ಟ್ರೇಲಿಯ ನಡುವಿನ ದ್ವಿತೀಯ ಏಕದಿನ ಪಂದ್ಯ ಇಲ್ಲಿಯೇ ನಡೆಯಲಿದೆ. ಇತಿಹಾಸವನ್ನು ಗಮನಿಸಿದರೆ ಇಷ್ಟರೊಳಗೆ ಇಲ್ಲಿ ಟಿಕೆಟ್‌ ಸೋಲ್ಡ್‌ ಔಟ್‌ ಆಗಬೇಕಿತ್ತು. ಆದರೆ ಈ ಬಾರಿ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಈಗಾಗಲೇ ಟಿಕೆಟ್‌ ಮಾರಟ ಆರಂಭವಾಗಿದ್ದರೂ ಕೌಂಟರ್‌ಗಳ ಮುಂದೆ ಭಾರೀ ಜನಸಂಖ್ಯೆಯೇನೂ ಗೋಚರಿಸುತ್ತಿಲ್ಲ. ಇದಕ್ಕೆ ಟಿಕೆಟ್‌ ದರವನ್ನು ಏರಿಸಿದ್ದೇ ಕಾರಣ ಎನ್ನಲಾಗುತ್ತಿದೆ.

ಕಳೆದ ಇಂಗ್ಲೆಂಡ್‌ ಏಕದಿನ ಪಂದ್ಯದ ವೇಳೆ ಕ್ರಮವಾಗಿ 500 ರೂ., 1,000 ರೂ., 1,500 ರೂ. ಇದ್ದ ಟಿಕೆಟ್‌ ಬೆಲೆ ಆಸ್ಟ್ರೇಲಿಯ ವಿರುದ್ಧದ ಪಂದ್ಯದ ವೇಳೆ ರೂ. 650, ರೂ. 1,300, ರೂ. 1,900ಕ್ಕೆ ಏರಿದೆ. ಜಿಎಸ್‌ಟಿ ಪ್ರಭಾವವೇ ಇದಕ್ಕೆ ಕಾರಣ. ಹೀಗಾಗಿ ಟಿಕೆಟ್‌ ಖರೀದಿಸಿದವರ ಮೊಗದಲ್ಲೂ ಸಂತಸದ ಕಳೆ ಇಲ್ಲ ಎಂಬುದಾಗಿ ಕೋಲ್ಕತಾದ ವೆಬ್‌ಸೈಟ್‌ ಒಂದು ವರದಿ ಮಾಡಿದೆ.

ಅಲ್ಲದೇ ಈ ಪಂದ್ಯದ ದಿನಾಂಕವೂ ಕ್ರಿಕೆಟ್‌ ವಾತಾವರಣಕ್ಕೆ ಪೂರಕವಾಗಿಲ್ಲ ಎಂಬ ಮಾತುಗಳೂ ಕೇಳಿಬರುತ್ತಿವೆ. ಕೋಲ್ಕತಾದ ಅತ್ಯಂತ ದೊಡ್ಡ ಹಬ್ಬವಾದ ದುರ್ಗಾಪೂಜೆಯ ಆರಂಭದ ದಿನದಂದೇ ಈ ಪಂದ್ಯ ನಡೆಯಲಿದೆ. ಹೀಗಾಗಿ ಕೋಲ್ಕತಾದ ಮಂದಿಯೆಲ್ಲ ಕ್ರಿಕೆಟ್‌ ವೀಕ್ಷಣೆಯ ಬದಲು ದುರ್ಗಾ ಪೂಜೆಯ ಪೆಂಡಾಲ್‌ಗ‌ಳತ್ತ ತೆರಳುವುದರಲ್ಲೇ ಹೆಚ್ಚಿನ ಆಸಕ್ತಿ ತೋರುತ್ತಿದ್ದಾರೆ.

ಪಂದ್ಯಕ್ಕಿನ್ನೂ ಒಂದು ವಾರಕ್ಕಿಂತ ಹೆಚ್ಚಿನ ಅವಧಿ ಇರುವುದರಿಂದ ಕ್ರಮೇಣ ಟಿಕೆಟ್‌ ಮಾರಾಟ ಚುರುಕುಗೊಳ್ಳಬಹುದು ಎಂಬುದು ಕೋಲ್ಕತಾ ಕ್ರಿಕೆಟ್‌ ಮಂಡಳಿಯ ನಿರೀಕ್ಷೆ.