ಅಜ್ಲಾನ್‌ ಶಾ ಹಾಕಿ: ಆಸ್ಟ್ರೇಲಿಯ ವಿರುದ್ಧ ಭಾರತಕ್ಕೆ ಸೋಲು

Team Udayavani, May 3, 2017, 12:22 PM IST

ಇಪೋ (ಮಲೇಶ್ಯ): ಆರಂಭದಲ್ಲಿ ಪ್ರಬಲ ಹೋರಾಟ ನೀಡಿ ಎರಡನೇ ಅವಧಿ ಯಲ್ಲಿ ಎಡವಿದ ಭಾರತ ಅಜ್ಲಾನ್‌ ಶಾ ಹಾಕಿ ಟೂರ್ನಿಯಲ್ಲಿ ವಿಶ್ವ ಚಾಂಪಿಯನ್‌ ಆಸ್ಟ್ರೇಲಿಯ ವಿರುದ್ಧ 3-1 ಗೋಲುಗಳಿಂದ ಸೋಲುಂಡಿದೆ. ಇದು ಈ ಕೂಟದಲ್ಲಿ ಭಾರತಕ್ಕೆ ಎದುರಾದ ಮೊದಲ ಸೋಲಾಗಿದೆ.

ಮಂಗಳವಾರ ನಡೆದ ಪಂದ್ಯದಲ್ಲಿ ಭಾರತದ ಪರ ಹರ್ಮನ್‌ಪ್ರೀತ್‌ ಸಿಂಗ್‌ (26ನೇ ನಿಮಿಷ) ಏಕೈಕ ಗೋಲು ದಾಖಲಿಸಿದರು. ಆಸ್ಟ್ರೇಲಿಯ ಪರ 3 ಗೋಲು ದಾಖಲಾದವು. ಪಂದ್ಯದ ಆರಂಭದಲ್ಲಿ ಸಮಬಲದ ಹೋರಾಟ ಇತ್ತು. 26ನೇ ನಿಮಿಷದಲ್ಲಿ ಭಾರತದ ಹರ್ಮನ್‌ಪ್ರೀತ್‌ ಸಿಂಗ್‌ ಚೆಂಡನ್ನು ಗೋಲಾಗಿಸುವ ಮೂಲಕ ಖಾತೆ ತೆರೆದರು. ನಂತರ 30ನೇ ನಿಮಿಷದಲ್ಲಿ ಆಸ್ಟ್ರೇಲಿಯ ಕೂಡ ಒಂದು ಗೋಲು ದಾಖಲಿಸಿತು. ಹೀಗಾಗಿ ಮೊದಲ ಅವಧಿಯಲ್ಲಿ ಪಂದ್ಯ 1-1 ಗೋಲುಗಳಿಂದ ಸಮಬಲದಲ್ಲಿತ್ತು.

ಎರಡನೇ ಅವಧಿಯಲ್ಲಿ ಎಡವಿದ ಭಾರತ: ಬಲಿಷ್ಠ ಆಸ್ಟ್ರೇಲಿಯ ವಿರುದ್ಧ ಭಾರತ ಮೊದಲ ಅವಧಿಯಲ್ಲಿ ಪ್ರಬಲ ಸ್ಪರ್ಧೆ ನೀಡಿತ್ತು. ಆದರೆ 2ನೇ ಅವಧಿಯಲ್ಲಿ ಆಸ್ಟ್ರೇಲಿಯ ಪ್ರಭುತ್ವ ಸಾಧಿಸಿತು. 31 ಮತ್ತು 51ನೇ ನಿಮಿಷದಲ್ಲಿ ಆಸ್ಟ್ರೇಲಿಯ ಆಟಗಾರರು ಚೆಂಡನ್ನು ಗೋಲಾಗಿಸುವ ಮೂಲಕ ಮೇಲುಗೈ ಸಾಧಿಸಿದರು.