ಒಳಾಂಗಣದಲ್ಲಿ ಅಭ್ಯಾಸ ನಡೆಸಿದ ಟೀಮ್‌ ಇಂಡಿಯಾ

Team Udayavani, Jan 1, 2018, 6:30 AM IST

ಕೇಪ್‌ಟೌನ್‌: ದಕ್ಷಿಣ ಆಫ್ರಿಕಾ ವಿರುದ್ಧ ಜ. 5ರಿಂದ ಆರಂಭವಾಗುವ ಮೊದಲ ಟೆಸ್ಟ್‌ ಪಂದ್ಯಕ್ಕಾಗಿ ಟೀಮ್‌ ಇಂಡಿಯಾ ಸದಸ್ಯರು ಶನಿವಾರದಿಂದ ಅಭ್ಯಾಸ ಆರಂಭಿಸಿದ್ದಾರೆ. ಆದರೆ ಕೇಪ್‌ಟೌನ್‌ನಲ್ಲಿ ಮಳೆಯಾಗುತ್ತಿರುವ ಕಾರಣ ರವಿವಾರದ ಅಭ್ಯಾಸವನ್ನು ಒಳಾಂಗಣದಲ್ಲಿ ನಡೆಸಬೇಕಾಯಿತು.

ಒಳಾಂಗಣದಲ್ಲಿ ಆಟಗಾರರು ಅಭ್ಯಾಸ ನಡೆಸುತ್ತಿರುವ  ಚಿತ್ರವೊಂದನ್ನು ಅಧಿಕೃತ ಜಾಲತಾಣದಲ್ಲಿ ಹಾಕಲಾಗಿದೆ. ವೃದ್ಧಿಮಾನ್‌ ಸಾಹ ಫ‌ುಟ್ಬಾಲ್‌ ಆಟ ಆಡುತ್ತಿರುವ ಚಿತ್ರವನ್ನು ಕೂಡ ಹಾಕಲಾಗಿದೆ. ಭಾರತೀಯ ತಂಡದ ಆರಂಭಿಕ ಮುರಳಿ ವಿಜಯ್‌ ಕೂಡ ನೆಟ್‌ ತಾಲೀಮ್‌ನಲ್ಲಿ ಭಾಗವಹಿಸಿದರು. ಶ್ರೀಲಂಕಾ ವಿರುದ್ಧದ ತವರಿನ ಟೆಸ್ಟ್‌ ಸರಣಿಯಲ್ಲಿ ಮುರಳಿ ವಿಜಯ್‌ ಗರಿಷ್ಠ ರನ್‌ ಗಳಿಸಿದವರಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ. ಗಾಯಗೊಂಡಿರುವ ಆರಂಭಿಕ ಶಿಖರ್‌ ಧವನ್‌ ಮೊದಲ ಟೆಸ್ಟ್‌ನಲ್ಲಿ ಆಡುವುದು ಅನುಮಾನ. ಹಾಗಾಗಿ ಅವರ ಬದಲಿಗೆ ವಿಜಯ್‌ ಅವರು ಕೆಎಲ್‌ ರಾಹುಲ್‌ ಜತೆ ಇನ್ನಿಂಗ್ಸ್‌ ಆರಂಭಿಸುವ ಸಾಧ್ಯತೆಯಿದೆ.

ದಕ್ಷಿಣ ಆಫ್ರಿಕಾ ಪ್ರವಾಸದ ವೇಳೆ ಭಾರತೀಯ ತಂಡ ಮೂರು ಟೆಸ್ಟ್‌, ಆರು ಏಕದಿನ ಮತ್ತು ಮೂರು ಪಂದ್ಯಗಳ ಟ್ವೆಂಟಿ20 ಸರಣಿಯಲ್ಲಿ ಆಡಲಿದೆ.