ಮಂದನಾ, ಮಿಥಾಲಿ ಬ್ಯಾಟಿಂಗ್ ಸಾಹಸ: ಸರಣಿ ಗೆದ್ದ ವನಿತೆಯರು

Team Udayavani, Jan 29, 2019, 7:56 AM IST

ಮೌಂಟ್ ಮೌಂಗನುಯಿ: ಭಾರತದ ಮಹಿಳೆಯರ ಕ್ರಿಕೆಟ್ ತಂಡ ಪುರುಷರ ತಂಡದಂತೆ ಕಿವೀಸ್ ನೆಲದಲ್ಲಿ ಸರಣಿ ಗೆದ್ದ ಸಾಹಸ ಮಾಡಿದೆ. ನ್ಯೂಜಿಲ್ಯಾಂಡ್ ವಿರುದ್ಧದ ಎರಡನೇ ಏಕದಿನ ಪಂದ್ಯದಲ್ಲಿ ಎಂಟು ವಿಕೆಟ್ ಗಳ ಭರ್ಜರಿ ಜಯ ಸಾಧಸಿದೆ. 

ಟಾಸ್ ಗೆದ್ದು ಬೌಲಿಂಗ್ ಆಯ್ಕೆ ಮಾಡಿದ ಮಿಥಾಲಿ ರಾಜ್ ನೇತೃತ್ವದ ಭಾರತೀಯ ತಂಡ ನ್ಯೂಜಿಲ್ಯಾಂಡ್ ತಂಡವನ್ನು 161 ರನ್ ಗಳಿಗೆ ಆಲ್ ಔಟ್ ಮಾಡಿತು. ಕಿವೀಸ್ ನಾಯಕಿ ಆಮಿ ಸ್ಯಾಟ್ಟರ್ ವೇಟ್ 71 ರನ್ ಗಳಿಸಿ ತಂಡದ ಪರ ಗರಿಷ್ಠ ರನ್ ಗಳಿಸಿದರು. ಬೇರೆ ಯಾವುದೇ ಅಟಗಾರರು ಬೌಲರ್ ಗಳ ಎದುರು ಕ್ರೀಸ್ ಕಚ್ಚಿ ನಿಲ್ಲಲು ಪರದಾಡಿದರು. ಭಾರತದ ಪರ ಅನುಭವಿ ಬೌಲರ್ ಜೂಲನ್ ಗೋಸ್ವಾಮಿ ಮೂರು ವಿಕೆಟ್ ಪಡೆದರೆ, ಏಕ್ತಾ ಬಿಶ್ಟ್, ದೀಪ್ತಿ ಶರ್ಮಾ, ಪೂನಂ ಯಾದವ್ ತಲಾ ಎರಡು ವಿಕೆಟ್ ಪಡೆದರು. 

ಮತ್ತೆ ಮಿಂಚಿದ ಮಂದನಾ, ಸಾಥ್ ನೀಡಿದ ಮಿಥಾಲಿ: ಕಿವೀಸ್ ನಿಡಿದ 162 ರನ್ ಗಳ ಗುರಿ ಬೆನ್ನಟ್ಟಿದ ಭಾರತ ಎರಡನೇ ಓವರ್ ನಲ್ಲಿಯೇ ಆಘಾತ ಅನುಬವಿಸಿತು. ಕಳೆದ ಪಂದ್ಯದಲ್ಲಿ ಅರ್ಧ ಶತಕ ಬಾರಿಸಿದ್ದ ಜೆಮಿಮಾ ರೋಡ್ರಿಗಸ್ ಶೂನ್ಯಕ್ಕೆ ಔಟಾದರು. ಎಂಟು ರನ್ ಗಳಿಸಿದ ದೀಪ್ತಿ ಶರ್ಮಾ ಔಟಾದಾಗ ತಂಡ ಸಂಕಷ್ಟಕ್ಕೆ ಸಿಲುಕಿತ್ತು. ಈ ವೇಳೆ ತಂಡದ ಮೊತ್ತ ಎರಡು ವಿಕೆಟ್ ನಷ್ಟಕ್ಕೆ 15 ರನ್. 

ನಂತರ ಜೊತೆಗೂಡಿದ ಸ್ಮೃತಿ ಮಂದನಾ ಮತ್ತು ನಾಯಕಿ ಮಿಥಾಲಿ ರಾಜ್ ಮುರಿಯದ 151 ರನ್ ಜೊತೆಯಾಟ ನಡೆಸಿ ತಂಡಕ್ಕೆ ಜಯ ಒದಗಿಸಿದರು. ಕಳೆದ ಪಂದ್ಯದಲ್ಲಿ ಶತಕ ಬಾರಿಸಿದ್ದ ಸ್ಮೃತಿ ಮಂದನಾ ಈ ಪಂದ್ಯದಲ್ಲೂ ಅದ್ಭುತ ಆಟವಾಡಿದರು. 83 ಎಸೆತ ಎದುರಿಸಿದ ಮಂದನಾ ಅಜೇಯ 90 ರನ್ ಗಳಿಸಿದರು. ಇವರಿಗೆ ಉತ್ತಮ ಸಾಥ್ ನೀಡಿದ ನಾಯಕಿ ಮಿಥಾಲಿ 63 ರನ್ ಗಳಿಸಿ ಅಜೇಯವಾಗುಳಿದರು.