ಇನ್ನು ಕ್ರಿಕೆಟಿಗರಿಗೆ ಬ್ಯುಸಿನೆಸ್‌ ಕ್ಲಾಸ್‌ ಟಿಕೆಟ್‌

Team Udayavani, Nov 14, 2017, 6:45 AM IST

ನವದೆಹಲಿ: ಭಾರತೀಯ ಕ್ರಿಕೆಟಿಗರ ಹಲವು ವರ್ಷಗಳ ಬೇಡಿಕೆಗೆ ಇದೀಗ ಒಪ್ಪಿಗೆ ಸಿಕ್ಕಿದೆ. ಇದುವರೆಗೆ ದೇಶೀಯವಾಗಿ ನಡೆಯುತ್ತಿದ್ದ ಅಂತಾರಾಷ್ಟ್ರೀಯ ಪಂದ್ಯಗಳಿಗೆ ಪ್ರಯಾಣಿಸುವಾಗ ವಿಮಾನದಲ್ಲಿ ಎಕಾನಮಿ ದರ್ಜೆಯ ಆಸನದಲ್ಲಿ ಕೂರುತ್ತಿದ್ದರು. ಇನ್ನು ಮುಂದೆ ತಂಡದ ಎಲ್ಲ ಕ್ರಿಕೆಟಿಗರು ಬ್ಯುಸಿನೆಸ್‌ ದರ್ಜೆಯ ಆಸದಲ್ಲಿ ಕೂರಬಹುದು. ಇದರಿಂದ ಆಟಗಾರರು ನಿಟ್ಟುಸಿರು ಬಿಡುವಂತಾಗಿದೆ. ಬಿಸಿಸಿಐನ ಹಂಗಾಮಿ ಅಧ್ಯಕ್ಷ ಸಿ.ಕೆ.ಖನ್ನಾ ಈ ಕುರಿತ ಪ್ರಸ್ತಾಪವನ್ನು ಮಾಡಿ ಒಪ್ಪಿಗೆ ಪಡೆದಿದ್ದಾರೆ. 

ಕೆಳದರ್ಜೆಯ ಎಕಾನಮಿ ಆಸನದಲ್ಲಿ ಪ್ರಯಾಣಿಸುವಾಗ ಇತರೆ ಪ್ರಯಾಣಿಕರು ಸೆಲ್ಫಿàಗಾಗಿ ಮುಗಿಬೀಳುತ್ತಾರೆ, ಜೊತೆಗೆ ಕಾಲಿಟ್ಟುಕೊಳ್ಳಲೂ ತೊಂದರೆಯಾಗುತ್ತದೆ ಎಂದು ಕ್ರಿಕೆಟಿಗರು ದುಮ್ಮಾನ ತೋಡಿಕೊಂಡಿದ್ದರು. ಬಹಳ ವರ್ಷಗಳ ನಂತರ ಇದನ್ನು ಗಂಭೀರವಾಗಿ ಪರಿಗಣಿಸಿದ ಬಿಸಿಸಿಐ ಆಟಗಾರರಿಗೆ ಈ ಅನುಕೂಲ ಮಾಡಿಕೊಟ್ಟಿದೆ. ಇದಕ್ಕೂ ಮುನ್ನ ತಂಡದ ನಾಯಕ ಮತ್ತು ಕೋಚ್‌ಗೆ ಮಾತ್ರ ಮೇಲ್ದರ್ಜೆಯ ಬ್ಯುಸಿನೆಸ್‌ ವಿಭಾಗದಲ್ಲಿ ಪ್ರಯಾಣಿಸುವ ಅವಕಾಶವಿತ್ತು.