ಭಾರತೀಯ ಪುರುಷರ ತಂಡ ಕಮಾಲ್! ಲಾನ್‌ ಬೌಲ್ಸ್‌ ನಲ್ಲಿ ಭಾರತಕ್ಕೆ ಪದಕ

Team Udayavani, Aug 6, 2022, 10:13 PM IST

ಬರ್ಮಿಂಗ್‌ಹ್ಯಾಮ್‌: ಗೇಮ್ಸ್‌ನ ಲಾನ್‌ ಬೌಲ್ಸ್‌ ಸ್ಪರ್ಧೆಯಲ್ಲಿ ಭಾರತ ಎರಡನೇ ಪದಕ ಗೆದ್ದಿದೆ. ಪುರುಷರ ವಿಭಾಗದ ಫೋರ್ಸ್‌ ಸ್ಪರ್ಧೆಯಲ್ಲಿ, ನಾಲ್ವರು ಸ್ಪರ್ಧಿಗಳ ಭಾರತೀಯ ತಂಡ ಫೈನಲ್‌ನಲ್ಲಿ ನಾರ್ದರ್ನ್ ಐರ್ಲೆಂಡ್‌ ಎದುರು 5-18 ಅಂಕಗಳಿಂದ ಸೋತು ಬೆಳ್ಳಿಯ ಪದಕಕ್ಕೆ ತೃಪ್ತಿಪಟ್ಟುಕೊಂಡಿತು.

ನಾರ್ದರ್ನ್ ಐರ್ಲೆಂಡ್‌ ಈ ಮೊದಲು 1998ರ ಗೇಮ್ಸ್‌ನಲ್ಲಿ ಚಿನ್ನದ ಪದಕ ಜಯಿಸಿತ್ತು.

ಸುನೀಲ್‌ ಬಹಾದೂರ್‌, ನವನೀತ್‌ ಸಿಂಗ್‌, ಚಂದನ್‌ ಕುಮಾರ್‌ ಸಿಂಗ್‌ ಮತ್ತು ದಿನೇಶ್‌ ಕುಮಾರ್‌ ಅವರನ್ನು ಒಳಗೊಂಡ ಭಾರತ ತಂಡವು ಆತಿಥೇಯ ಇಂಗ್ಲೆಂಡ್‌ ತಂಡವನ್ನು ಸೆಮಿಫೈನಲ್‌ನಲ್ಲಿ 13-12 ಅಂಕಗಳಿಂದ ಸೋಲಿಸಿ ಫೈನಲಿಗೇರಿತ್ತು. ಆ ಮೂಲಕ ಕಡಿಮೆಪಕ್ಷ ಬೆಳ್ಳಿ ಗೆಲ್ಲುವುದನ್ನು ಖಚಿತಪಡಿಸಿಕೊಂಡಿತ್ತು. ಈಗ ಬೆಳ್ಳಿಯನ್ನೇ ಗೆದ್ದಿದೆ. ಈ ಮೊದಲು ಭಾರತೀಯ ತಂಡವು ವನಿತಾ ನಾಲ್ವರು ಸ್ಪರ್ಧಿಗಳ ಫೈನಲ್‌ ಹೋರಾಟದಲ್ಲಿ ದಕ್ಷಿಣ ಆಫ್ರಿಕಾವನ್ನು 17-10 ಅಂಕಗಳಿಂದ ಸೋಲಿಸಿ ಚಿನ್ನ ಗೆದ್ದು ಐತಿಹಾಸಿಕ ಸಾಧನೆ ಮಾಡಿತ್ತು.