ಎಲೋರ್ಡ ಕಪ್‌ ಬಾಕ್ಸಿಂಗ್‌: ಕಲೈವಾಣಿ ಫೈನಲಿಗೆ

Team Udayavani, Jul 2, 2022, 11:25 PM IST

ಹೊಸದಿಲ್ಲಿ: ಭಾರತೀಯ ಬಾಕ್ಸರ್‌ ಕಲೈವಾಣಿ ಶ್ರೀನಿವಾಸನ್‌ ಅವರು ಕಝಕ್‌ಸ್ಥಾನದ ನೂರ್‌-ಸುಲ್ತಾನ್‌ನಲ್ಲಿ ನಡೆಯುತ್ತಿರುವ ಎಲೋರ್ಡ ಕಪ್‌ ಬಾಕ್ಸಿಂಗ್‌ ಕೂಟದಲ್ಲಿ ಫೈನಲ್‌ ಹಂತಕ್ಕೇರಿದ್ದಾರೆ. ಫೈನಲ್‌ ಹೋರಾಟ ಸೋಮವಾರ ನಡೆಯಲಿದ್ದು ಕಲೈವಾಣಿ ಅವರು ಚಿನ್ನ ಗೆಲ್ಲುವ ವಿಶ್ವಾಸದಲ್ಲಿದ್ದಾರೆ.

ವನಿತೆಯರ 48 ಕೆ.ಜಿ. ವಿಭಾಗದಲ್ಲಿ ಉಜ್ಬೆಕಿಸ್ಥಾನದ  ಫೊಝಿ ಲೋವಾ ಅವರ ವಿರುದ್ಧ ಕಲೈವಾಣಿ ಅಮೋಘವಾಗಿ ಆಡಿದರು. ಶಕ್ತಿ ಶಾಲಿ ಹೊಡೆತ ಮತ್ತು ನಿರಂತರ ಆಕ್ರಮಣದಿಂದ ಎದುರಾಳಿಗೆ ಪಂದ್ಯದಲ್ಲಿ ಮೇಲುಗೈ ಸಾಧಿಸಲು ಅವಕಾಶ ನೀಡದ ಚೆನ್ನೈ ಮೂಲದ ಕಲೈವಾಣಿ ಸುಲಭವಾಗಿ ಫೈನಲ್‌ ಹಂತಕ್ಕೇರಿದರು.

ವಿಜಯದ ಆರಂಭ
ಸ್ಪರ್ಧೆಯ ನಾಲ್ಕನೇ ದಿನ ಕುಲದೀಪ್‌ ಭಾರತಕ್ಕೆ ವಿಜಯದ ಆರಂಭ ಒದಗಿಸಿದರು. ಪುರುಷರ 48 ಕೆ.ಜಿ. ವಿಭಾಗದಲ್ಲಿ ಸ್ಥಳೀಯ ಕೈರಟ್‌ ಯೆನುìರ್‌ ಅವರಿಂದ ಕುಲದೀಪ್‌ ತೀವ್ರ ಹೋರಾಟ ಎದುರಿಸಿದರು.ಎಚ್ಚರಿಕೆಯ ಹೆಜ್ಜೆ ಮತ್ತು ಆಕ್ರಮಣದಿಂದ ಗೆದ್ದ ಕುಲದೀಪ್‌ ಸೆಮಿಫೈನಲ್‌ ಹಂತಕ್ಕೇರಿದರು.

ಭಾರತದ ಇನ್ನೋರ್ವ ಸ್ಪರ್ಧಿ ಯಶ್‌ಪಾಲ್‌ ಕ್ವಾರ್ಟರ್‌ಫೈನಲ್‌ನಲ್ಲಿ ಕಝಕ್‌ಸ್ಥಾನದ ಅಸ್ಲಂಬೆಕ್‌ ಶ್ಯಾಂಬರ್‌ ಜಿನೋವ್‌ ಅವರೆದುರು 0-5 ಅಂತರದಿಂದ ಸೋತು ಹೊರಬಿದ್ದರು.

ವನಿತೆಯರ ವಿವಿಧ ವಿಭಾಗಗಳಲ್ಲಿ ಬಬಿತಾ ಬಿಸ್ತ್ (81 ಕೆ.ಜಿ.), ಜ್ಯೋತಿ (52 ಕೆ.ಜಿ.) ಮತ್ತು ನೀಮಾ (63 ಕೆ.ಜಿ.) ಸೆಮಿಫೈನಲ್‌ ಹೋರಾಟದಲ್ಲಿ ಸೋತು ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡರು.