INDvsAUS: ಮೈದಾನದಲ್ಲಿ ಜಗಳವಾಡಿದ ಸಿರಾಜ್‌- ಹೆಡ್‌ ವಿರುದ್ದ ಐಸಿಸಿ ಕಠಿಣ ನಿರ್ಧಾರ

Team Udayavani, Dec 9, 2024, 1:45 PM IST

ಅಡಿಲೇಡ್‌: ಬಾರ್ಡರ್‌ ಗಾವಸ್ಕರ್‌ ಟೆಸ್ಟ್‌ ಸರಣಿಯ (Border Gavaskar Test Series) ಎರಡನೇ ಪಂದ್ಯದಲ್ಲಿ ಭಾರತದ ತಂಡ ಸೋಲು ಕಂಡಿದೆ. ಅಡಿಲೇಡ್‌ ನಲ್ಲಿ ನಡೆದ ಪಿಂಕ್‌ ಬಾಲ್‌ ಪಂದ್ಯದಲ್ಲಿ ರೋಹಿತ್‌ ಪಡೆಗೆ ಸೋಲಾಗಿದೆ. ಆದರೆ ಈ ಪಂದ್ಯದಲ್ಲಿ ಭಾರತದ ವೇಗಿ ಮೊಹಮ್ಮದ್‌ ಸಿರಾಜ್‌ ಮತ್ತು ಆಸೀಸ್‌ ಬ್ಯಾಟರ್‌ ಟ್ರಾವಿಸ್‌ ಹೆಡ್‌ ನಡುವೆ ಮೈದಾನದಲ್ಲಿ ಜಗಳವಾಗಿದ್ದು ದೊಡ್ಡ ಸುದ್ದಿಯಾಗಿತ್ತು. ಇದೀಗ ಐಸಿಸಿ ಇದಕ್ಕೆ ಮದ್ದರೆಯಲು ಮುಂದಾಗಿದೆ.

ಸಿರಾಜ್ ಅವರು ಟ್ರಾವಿಸ್‌ ಹೆಡ್‌ ಅವರನ್ನು ವಜಾಗೊಳಿಸಿದ ನಂತರ ನಾಟಕೀಯವಾಗಿ ಸೆಂಡ್‌ ಆಫ್‌ ನೀಡಿದರು. ಮೈದಾನದಲ್ಲಿ ಇಬ್ಬರ ನಡುವೆ ಕೆಲವು ಶಬ್ದಗಳೂ ವಿನಿಮಯಗೊಂಡವು. ಹೆಡ್ ಮತ್ತು ಸಿರಾಜ್ ಇಬ್ಬರೂ ದಿನದಾಟದ ಬಳಿಕ ಇದರ ಬಗ್ಗೆ ಭಿನ್ನ ರೀತಿಯ ಪ್ರತಿಕ್ರಿಯೆ ನೀಡಿದ್ದರು. ಇದು ದೊಡ್ಡ ಸುದ್ದಿಯಾಗಿದ್ದು, ಮಾಜಿ ಆಟಗಾರರು ಕೂಡಾ ಈ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದರು.

ಇದೀಗ ಸಿರಾಜ್ ಮತ್ತು ಹೆಡ್ ಈ ಕೃತ್ಯಕ್ಕಾಗಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ICC) ನಿಂದ ದಂಡನೆಗೆ ಒಳಗಾಗುತ್ತಾರೆ ಎಂದು ವರದಿಯೊಂದು ಹೇಳಿದೆ.

ಅಡಿಲೇಡ್‌ನಲ್ಲಿನ ಮೈದಾನದ ಘಟನೆಯಿಂದಾಗಿ ಇಬ್ಬರಲ್ಲಿ ಯಾರನ್ನೂ ಅಮಾನತುಗೊಳಿಸಲಾಗುವುದಿಲ್ಲ ಎಂದು ನಿರೀಕ್ಷಿಸಲಾಗಿದೆ. ಇಬ್ಬರಿಗೂ ದಂಡದ ರೂಪದಲ್ಲಿ ನಿರ್ಬಂಧಗಳನ್ನು ಹೊರಡಿಸುವ ಸಾಧ್ಯತೆಯಿದೆ.

ದಿ ಡೈಲಿ ಟೆಲಿಗ್ರಾಫ್‌ನಲ್ಲಿನ ವರದಿಯ ಪ್ರಕಾರ, ಇಬ್ಬರೂ ಆಟಗಾರರನ್ನು ಅಪೆಕ್ಸ್ ಬಾಡಿ ತಪ್ಪಿತಸ್ಥರೆಂದು ತೀರ್ಪು ನೀಡಿದೆ. ಇಂದು ವಿಚಾರಣೆಯ ನಂತರ ದಂಡದ ಬಗ್ಗೆ ಪ್ರಕಟಿಸಲಾಗುವುದು.