ಏಷ್ಯಾ ಕಿರಿಯರ ಬಾಕ್ಸಿಂಗ್‌: ಭಾರತಕ್ಕೆ ಒಲಿಯಿತು 8 ಚಿನ್ನ

Team Udayavani, Aug 30, 2021, 9:38 PM IST

ನವದೆಹಲಿ: ದುಬೈನಲ್ಲಿ ನಡೆಯುತ್ತಿರುವ ಏಷ್ಯಾ ಕಿರಿಯರ ಬಾಕ್ಸಿಂಗ್‌ ಚಾಂಪಿಯನ್‌ಶಿಪ್‌ನಲ್ಲಿ ಭಾರತ 8 ಚಿನ್ನ, 5 ಬೆಳ್ಳಿ, 6 ಕಂಚಿನ ಪದಕಗಳ ಸಾಧನೆಯೊಂದಿಗೆ ಕೂಟವನ್ನು ಯಶಸ್ವಿಯಾಗಿ ಮುಗಿಸಿದೆ.

ಫೈನಲ್‌ ಪ್ರವೇಶಿಸಿದ್ದ ಭಾರತದ 10 ಬಾಲಕಿಯರಲ್ಲಿ 6 ಮಂದಿ ಚಿನ್ನ ಗೆದ್ದಿರುವುದು ಮಹಿಳೆಯರ ಸಾಧನೆಗೆ ಹಿಡಿದ ಕೈಗನ್ನಡಿಯಾಗಿದೆ. ಉಳಿದ ನಾಲ್ವರು ಬೆಳ್ಳಿ ಪದಕ ಗೆದ್ದರು. ಬಾಲಕರ ವಿಭಾಗದಲ್ಲಿ ಫೈನಲ್‌ ಪ್ರವೇಶಿಸಿದ್ದ ಮೂವರಲ್ಲಿ ಇಬ್ಬರು ಚಿನ್ನದ ಪದಕಕ್ಕೆ ಮುತ್ತಿಟ್ಟರು.

ಕಿರಿಯರ ಈ ಸಾಧನೆ ಎನ್ನುವುದು ಭಾರತದ ಬಾಕ್ಸಿಂಗ್‌ ಭವಿಷ್ಯ ಉಜ್ವಲವಾಗಿದೆ ಎಂಬುದನ್ನು ಸಾಬೀತುಪಡಿಸಿದೆ. ನಿಖೀತಾ ಚಂದ್‌ ( 60 ಕೆಜಿ), ಮಾಹಿ ರಾಘವ್‌ (63 ಕೆಜಿ), ಪ್ರಾಂಜಲಾ ಯಾದವ್‌ (75 ಕೆಜಿ), ಕೀರ್ತಿ (+81 ಕೆಜಿ) ಬಂಗಾರಕ್ಕೆ ಕೊರಳೊಡ್ಡಿದ ಪ್ರತಿಭೆಗಳು.

ಇದಕ್ಕೂ ಮೊದಲು ರೋಹಿತ್‌ ಚಮೋಲಿ (48 ಕೆಜಿ), ಭರತ್‌ ಜೂನ್‌ (+81 ಕೆಜಿ), ಬಾಲಕಿಯರ ವಿಭಾಗದ ವಿಶು ರಥೀ (48 ಕೆಜಿ), ತನು (52 ಕೆಜಿ) ಚಿನ್ನದ ಪದಕ ಜಯಿಸಿದ್ದರು.