ಭಜರಂಗ್‌ರನ್ನು ಗಾಯಗೊಳಿಸಲು ವ್ಯವಸ್ಥಿತ ಹುನ್ನಾರ?

Team Udayavani, Jul 28, 2019, 5:33 AM IST

ನವದಹೆಲಿ: ಮುಂದಿನ ಒಲಿಂಪಿಕ್ಸ್‌ ಕುಸ್ತಿಯಲ್ಲಿ ಭಾರತಕ್ಕೆ ಚಿನ್ನವನ್ನು ಗೆದ್ದುಕೊಡುವ ಭರವಸೆ ಮೂಡಿಸಿರುವ ಭಜರಂಗ್‌ ಪುನಿಯರನ್ನು ಗಾಯಗೊಳಿಸುವ ಹುನ್ನಾರವೊಂದನ್ನು ನಡೆಸಿದ ಆಘಾತಕಾರಿ ಸಂಗತಿ ಬೆಳಕಿಗೆ ಬಂದಿದೆ. ಮುಂಬರುವ ವಿಶ್ವ ಚಾಂಪಿಯನ್‌ಶಿಪ್‌ಗಾಗಿ ನಡೆಸಿದ ಅರ್ಹತಾ ಸುತ್ತಿನಲ್ಲಿ ಗಾಯಗೊಳಿಸಿ, ಅನರ್ಹರನ್ನಾಗಿ ಮಾಡುವ ಪಿತೂರಿ ಬಗ್ಗೆ ಮೊದಲೇ ಸುಳಿವು ಸಿಕ್ಕಿದ್ದರಿಂದ ಭಜರಂಗ್‌ರನ್ನು ಆಡುವುದರಿಂದಲೇ ತಡೆಯಲಾಗಿದೆ. ಇಂತಹ ವರದಿಯೊಂದು ಆಂಗ್ಲಪತ್ರಿಕೆಯೊಂದರಲ್ಲಿ ಪ್ರಕಟವಾಗಿದೆ. ಆದರೆ ಹುನ್ನಾರ ನಡೆಸಿದ ವ್ಯಕ್ತಿಯ ಹೆಸರನ್ನು ಮಾತ್ರ ಬಹಿರಂಗಪಡಿಸಿಲ್ಲ.

ಶುಕ್ರವಾರ ಬೆಳಗ್ಗೆ ಇಂತಹ ಸುಳಿವು ಸಿಕ್ಕಿದ್ದರಿಂದ 65 ಕೆಜಿ ವಿಭಾಗದಲ್ಲಿ ಭಜರಂಗ್‌ಗೆ ಸ್ಪರ್ಧಿಸಲು ಅವಕಾಶ ನೀಡಲಿಲ್ಲ. ಈ ನಡುವೆ ಭಜರಂಗ್‌ರನ್ನು ಗಾಯಗೊಳಿಸಲು ಸಜ್ಜಾಗಿದ್ದ ಶಂಕಿತ ಸ್ಪರ್ಧಿಗೂ ಕಣಕ್ಕಿಳಿಯಲು ಅವಕಾಶ ನೀಡಲಿಲ್ಲ! ಅಚ್ಚರಿಯೆಂದರೆ ರಾಷ್ಟ್ರೀಯ ಶಿಬಿರದಲ್ಲಿ ಪಾಲ್ಗೊಂಡಿದ್ದ ಕುಸ್ತಿ ಪಟುಗಳಿಗೆ ಮಾತ್ರ ಅರ್ಹತಾ ಹೋರಾಟದಲ್ಲಿ ಅವಕಾಶ ನೀಡಲಾಗುವುದೆಂದು ಮೊದಲೇ ಹೇಳಲಾಗಿತ್ತು. ಆದರೆ ಶಂಕಿತ ವ್ಯಕ್ತಿ ರಾಷ್ಟ್ರೀಯ ಶಿಬಿರದಲ್ಲಿ ಭಾಗವಹಿಸಿಯೇ ಇರಲಿಲ್ಲವೆನ್ನುವುದು ಗೊತ್ತಾಗಿದೆ. ಇದು ಭಾರತ ಕುಸ್ತಿ ಒಕ್ಕೂಟದ ಬಗ್ಗೆಯೇ ಅನುಮಾನ ಮೂಡಿಸಿದೆ.