ಐಪಿಎಲ್‌ ಪ್ಲೇ-ಆಫ್, ಫೈನಲ್‌ ಒಂದು ಗಂಟೆ ಬೇಗ ಆರಂಭ

Team Udayavani, May 10, 2018, 7:45 AM IST

ಹೊಸದಿಲ್ಲಿ: ಐಪಿಎಲ್‌ ಅಭಿಮಾನಿಗಳ ಪಾಲಿಗೊಂದು ಸಿಹಿ ಸುದ್ದಿ ಬಿತ್ತರಿಸಲ್ಪಟ್ಟಿದೆ. ಈ ಬಾರಿಯ ಐಪಿಎಲ್‌ ಪ್ಲೇ-ಆಫ್ ಹಾಗೂ ಫೈನಲ್‌ ಪಂದ್ಯಗಳು ಒಂದು ಗಂಟೆ ಮುಂಚಿತವಾಗಿ ಆರಂಭವಾಗಲಿವೆ. ರಾತ್ರಿ 8 ಗಂಟೆ ಬದಲು 7 ಗಂಟೆಗೆ ಪಂದ್ಯಗಳನ್ನು ಪ್ರಾಂಭಿಸಲಾಗುವುದು ಎಂದು ಐಪಿಎಲ್‌ ಚೇರ್ಮನ್‌ ರಾಜೀವ್‌ ಶುಕ್ಲಾ ಹೇಳಿದ್ದಾರೆ.

ಪ್ರೇಕ್ಷಕರ ಅನುಕೂಲ ಹಾಗೂ ನಿಧಾನ ಗತಿಯ ಓವರ್‌ಗಳಿಂದಾಗಿ ಈ ನಿರ್ಧಾರಕ್ಕೆ ಬರಲಾಗಿದೆ ಎಂದು ಶುಕ್ಲಾ ಸ್ಪಷ್ಟಪಡಿಸಿದರು. “ಕೆಲವು ತಂಡಗಳು ಓವರ್‌ ಗತಿಯನ್ನು ಕಾಯ್ದುಕೊಳ್ಳುವಲ್ಲಿ ವಿಫ‌ಲವಾದ್ದರಿಂದ ಪಂದ್ಯಗಳು ರಾತ್ರಿ 12ರ ಬಳಿಕವೂ ಮುಂದುವರಿದದ್ದಿದೆ. ಇದರಿಂದ ವೀಕ್ಷಕರಿಗೆ ಮನೆ ಮುಟ್ಟಲು ಸಮಸ್ಯೆ ಎದುರಾಗಿತ್ತು. ಅಲ್ಲದೇ ಮರುದಿನ ಶಾಲೆ, ಕಾಲೇಜು, ಕಚೇರಿಗೆ ಹೋಗಲೂ ತೊಂದರೆ ಆಗುತ್ತಿತ್ತು. ಟಿವಿ ವೀಕ್ಷಕರಿಗೂ ಸಮಸ್ಯೆ ಎದುರಾಗುವುದು ಸಾಮಾನ್ಯವಾಗಿತ್ತು. ಇದನ್ನೆಲ್ಲ ಪರಿಗಣಿಸಿ ಪ್ಲೇ-ಆಫ್ ಹಾಗೂ ಫೈನಲ್‌ ಸ್ಪರ್ಧೆಗಳನ್ನು ಒಂದು ಗಂಟೆ ಮುಂಚಿತವಾಗಿ ಆರಂಭಿಸಲು ನಿರ್ಧರಿಸಲಾಗಿದೆ’ ಎಂದು ಶುಕ್ಲಾ ಹೇಳಿದರು.

2 ಪ್ಲೇ-ಆಫ್ ಪಂದ್ಯಗಳು ಪುಣೆ ಬದಲು ಕೋಲ್ಕತಾದಲ್ಲಿ ನಡೆಯಲಿವೆ ಎಂದೂ ರಾಜೀವ್‌ ಶುಕ್ಲಾ ಮತ್ತೂಮ್ಮೆ ತಿಳಿಸಿದರು (ಎಲಿಮಿನೇಟರ್‌ ಮತ್ತು ಕ್ವಾಲಿಫ‌ಯರ್‌-2). ಉಳಿದೆರಡು ಪಂದ್ಯಗಳ ಆತಿಥ್ಯವನ್ನು ಮುಂಬಯಿ ವಹಿಸಲಿದೆ (ಕ್ವಾಲಿಫ‌ಯರ್‌-1 ಮತ್ತು ಫೈನಲ್‌).