ಸಂಜು ಸ್ಯಾಮ್ಸನ್‌ಗೆ ಅಡ್ಡಿಯಾದ ಪಿಝಾ ಬಾಯ್‌!

Team Udayavani, Mar 31, 2019, 1:28 PM IST

ಹೈದರಾಬಾದ್‌: ಶುಕ್ರವಾರ ರಾತ್ರಿ ಭಾರೀ ಜೋಶ್‌ನಲ್ಲಿದ್ದ ಸಂಜು ಸ್ಯಾಮ್ಸನ್‌ ಹೈದರಾಬಾದ್‌ ವಿರುದ್ಧ ಶತಕ ಬಾರಿಸಿ ಮೆರೆದರೂ ಅವರ ರಾಜಸ್ಥಾನ್‌ ತಂಡ ಸೋತದ್ದು ಬೇರೆ ಮಾತು. ಈ ಬ್ಯಾಟಿಂಗ್‌ ಅಬ್ಬರದ ವೇಳೆ ಸ್ಯಾಮ್ಸನ್‌ಗೆ ಬ್ರೇಕ್‌ ಹಾಕಲು ಹೈದರಾಬಾದ್‌ ಬೌಲರ್‌ಗಳಿಗೆ ಸಾಧ್ಯವಾಗದೇ ಇರಬಹುದು, ಆದರೆ ಸ್ಟೇಡಿಯಂನಲ್ಲಿ ಪಿಝಾ ಮಾರುತ್ತಿದ್ದ ಹುಡುಗನೊಬ್ಬ ಸ್ಯಾಮ್ಸನ್‌ ಆಟವನ್ನು ಸ್ವಲ್ಪ ಕಾಲ ತಡೆದು ನಿಲ್ಲಿಸಿ ಸುದ್ದಿಯಾಗಿದ್ದಾನೆ!

ಅದು ರಾಜಸ್ಥಾನ್‌ ಸರದಿಯ 12ನೇ ಓವರ್‌ ಆಗಿತ್ತು. ಸೈಟ್‌ಸ್ಕ್ರೀನ್‌ ಹತ್ತಿರ ಯಾರೋ ಸುಳಿದಂತೆ ಕಂಡುಬಂದುದರಿಂದ ಸ್ಯಾಮ್ಸನ್‌ ಪಂದ್ಯ ನಿಲ್ಲಿಸುವಂತೆ ಕೈಸನ್ನೆ ಮಾಡಿದರು. ಕೆಮರಾಗಳೆಲ್ಲ ಸೈಟ್‌ಸ್ಕ್ರೀನ್‌ನತ್ತ ಮುಖ ಮಾಡಿದಾಗ ಪಿಝಾ ಮಾರುವ ಹುಡುಗನೊಬ್ಬ ಈ ದಾರಿಯಾಗಿ ಹೋಗುತ್ತಿದ್ದ ದೃಶ್ಯ ಗೋಚರಿಸಿತು. ಆತ ಅಲ್ಲಿಂದ ಹೋದ ಬಳಿಕ ಸ್ಯಾಮ್ಸನ್‌ ತಮ್ಮ ಬ್ಯಾಟಿಂಗ್‌ ಅಬ್ಬರವನ್ನು ಮುಂದುವರಿಸಿದರು.