ಕ್ವಾರಂಟೈನ್‌ ಮುಗಿಸಿ ಅಭ್ಯಾಸಕ್ಕಿಳಿದ ಪಂಜಾಬ್‌, ರಾಜಸ್ಥಾನ್‌ ಕ್ರಿಕೆಟಿಗರು

Team Udayavani, Aug 26, 2020, 6:40 PM IST

ದುಬಾೖ: ಕಳೆದ ವಾರವೇ ಯುಎಇಗೆ ಬಂದಿಳಿದಿದ್ದ ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌ ಮತ್ತು ರಾಜಸ್ಥಾನ್‌ ರಾಯಲ್ಸ್‌ ತಂಡಗಳ ಕ್ರಿಕೆಟಿಗರು 6 ದಿನಗಳ ಕ್ವಾರಂಟೈನ್‌ ಮುಗಿಸಿ ಮೊದಲ ಸುತ್ತಿನ ಅಭ್ಯಾಸ ನಡೆಸಿದರು. ದುಬಾೖಯಲ್ಲಿರುವ ಇತ್ತಂಡಗಳ ಆಟಗಾರರು ಬುಧವಾರ ಸಂಜೆ ಐಸಿಸಿ ಗ್ರೌಂಡ್‌ನ‌ಲ್ಲಿ ದೈಹಿಕ ಕಸರತ್ತಿಗೆ ಸಂಬಂಧಿಸಿದ ವ್ಯಾಯಾಮ ನಡೆಸಿದರು ಎಂದು ಮೂಲಗಳು ತಿಳಿಸಿವೆ.

ಕ್ವಾರಂಟೈನ್‌ ಅವಧಿಯಲ್ಲಿ ಕ್ರಿಕೆಟಿಗರಿಗೆ, ತಂಡದ ಸಹಾಯಕ ಸಿಬಂದಿ ಮತ್ತು ಅಧಿಕಾರಿಗಳಿಗೆ 3 ಸುತ್ತಿನ ಕೋವಿಡ್‌-19 ಟೆಸ್ಟ್‌ ನಡೆಸಲಾಗಿತ್ತು. ಎಲ್ಲರ ವರದಿಯೂ ನೆಗೆಟಿವ್‌ ಬಂದಿದೆ. ಈ 6 ದಿನಗಳ ಕಾಲ ಯಾವ ಕ್ರಿಕೆಟಿಗರೂ ತಮ್ಮ ಕೊಠಡಿಯಿಂದ ಹೊರಗೆ ಕಾಲಿಟ್ಟಿರಲಿಲ್ಲ.

ಮಿಲ್ಲರ್‌ ವಿಳಂಬ ಆಗಮನ
ಮಂಗಳವಾರವಷ್ಟೇ ಆಗಮಿಸಿದ ರಾಜಸ್ಥಾನ್‌ ರಾಯಲ್ಸ್‌ ತಂಡದ ಡೇವಿಡ್‌ ಮಿಲ್ಲರ್‌ ಮಾತ್ರ ಅಭ್ಯಾಸದಿಂದ ಹೊರಗುಳಿದರು. ಅವರು 6 ದಿನಗಳ ಕ್ವಾರಂಟೈನ್‌ ಅವಧಿಯನ್ನು ಪೂರೈಸಬೇಕಿದೆ. ಕಳೆದ ವರ್ಷ ಪಂಜಾಬ್‌ ತಂಡದಲ್ಲಿದ್ದ ಮಿಲ್ಲರ್‌ ಈ ಬಾರಿ ರಾಜಸ್ಥಾನ್‌ ತಂಡಕ್ಕೆ ಸೇರ್ಪಡೆಗೊಂಡಿದ್ದಾರೆ. ದಕ್ಷಿಣ ಆಫ್ರಿಕಾ ಮತ್ತೋರ್ವ ಕ್ರಿಕೆಟಿಗ, ಪಂಜಾಬ್‌ ತಂಡದ ಸದಸ್ಯ ಹಾರ್ಡಸ್‌ ವಿಲ್‌ಜೊನ್‌ ಕೂಡ 6 ದಿನಗಳ ಕ್ವಾರಂಟೈನ್‌ನಲ್ಲಿದ್ದಾರೆ.

ಆರ್‌ಸಿಬಿ, ಮುಂಬೈ ಮತ್ತು ಚೆನ್ನೈ ಕ್ರಿಕೆಟಿಗರ ಕ್ವಾರಂಟೈನ್‌ ಅವಧಿ ಗುರುವಾರಕ್ಕೆ ಕೊನೆಗೊಳ್ಳಲಿದ್ದು, ಅನಂತರ ಅಭ್ಯಾಸಕ್ಕೆ ಇಳಿಯಲಿದ್ದಾರೆ. ಈ ತಂಡಗಳ ಆಟಗಾರರು ಶುಕ್ರವಾರ ಯುಎಇಗೆ ಆಗಮಿಸಿದ್ದರು.