IPL 2023: ಉಮ್ರಾನ್‌ ಮಲಿಕ್‌ಗೆ ಮುರಿದ ಬೇಲ್ಸ್‌  ಉಡುಗೊರೆ!

Team Udayavani, Apr 11, 2023, 6:49 AM IST

ಹೈದರಾಬಾದ್‌: ಸನ್‌ರೈಸರ್ ಹೈದರಾಬಾದ್‌ ಪಾಳೆಯದಲ್ಲಿ ಗೆಲುವಿನ ಸೂರ್ಯೋದಯವಾಗಿದೆ. ರವಿವಾರ ರಾತ್ರಿ ಪಂಜಾಬ್‌ ಕಿಂಗ್ಸ್‌ ವಿರುದ್ಧ ಘಾತಕ ಬೌಲಿಂಗ್‌ ನಡೆಸಿ 6 ವಿಕೆಟ್‌ಗಳ ಜಯ ಸಾಧಿಸಿತು.

ಈ ಜಯದಲ್ಲಿ ಹೈದರಾಬಾದ್‌ ಬೌಲರ್‌ಗಳ ಕೊಡುಗೆ ದೊಡ್ಡದಿತ್ತು. ವೇಗಿಗಳಾದ ಮಾರ್ಕೊ ಜಾನ್ಸೆನ್‌, ಉಮ್ರಾನ್‌ ಮಲಿಕ್‌ ಅಮೋಘ ಬೌಲಿಂಗ್‌ ಸಂಘಟಿಸಿದ್ದರು. ಹೇಳಿ ಕೇಳಿ ಉಮ್ರಾನ್‌ ಮಲಿಕ್‌ ಅವರದು ಸೂಪರ್‌ ವೇಗದ ಎಸೆತಗಳು. ಇವರ ಎಸೆತವೊಂದು ಹರ್‌ಪ್ರೀತ್‌ ಬ್ರಾರ್‌ ಅವರನ್ನು ಕ್ಲೀನ್‌ಬೌಲ್ಡ್‌ ಮಾಡಿದಾಗ ಬೇಲ್ಸ್‌ ಎರಡು ತುಂಡಾಯಿತು. ಇದನ್ನು ರಾಹುಲ್‌ ತ್ರಿಪಾಠಿ ತೆಗೆದಿರಿಸಿದರು. ಪಂದ್ಯದ ಬಳಿಕ ಉಮ್ರಾನ್‌ ಮಲಿಕ್‌ಗೆ ಉಡುಗೊರೆಯಾಗಿ ನೀಡಿದರು.

“ಒಮ್ಮೆ ನಾನು ಟೆನಿಸ್‌ ಬಾಲ್‌ನಲ್ಲೂ ಬೇಲ್ಸ್‌ ಮುರಿದಿದ್ದೆ. ಕಳೆದ ಐಪಿಎಲ್‌ನಲ್ಲಿ ಒಂದೆರಡು ಬೇಲ್ಸ್‌ ತುಂಡಾಗಿತ್ತು. ಭಾರತ ಪರ ಆಡುವಾಗಲೂ ಇದು ಸಂಭವಿಸಿತ್ತು. ಒಟ್ಟಾರೆಯಾಗಿ ನನ್ನ ಬೌಲಿಂಗ್‌ ನನಗೆ ತೃಪ್ತಿ ತಂದಿದೆ’ ಎಂಬುದಾಗಿ ಉಮ್ರಾನ್‌ ಮಲಿಕ್‌ ಪ್ರತಿಕ್ರಿಯಿಸಿದರು.