ಕೋಚ್‌ ಆಯ್ಕೆಯಲ್ಲಿ ಸಣ್ಣತನ ತೋರಲಾಗಿದೆ: ಇರ್ಫಾನ್ ಪಠಾಣ್ ಗಂಭೀರ ಆರೋಪ

Team Udayavani, Jul 16, 2023, 11:32 AM IST

ನವದೆಹಲಿ: ಭಾರತ ಕ್ರಿಕೆಟ್‌ ತಂಡದ ಮಾಜಿ ಆಲ್‌ರೌಂಡರ್‌ ಇರ್ಫಾನ್‌ ಪಠಾಣ್‌, ಮಾಜಿ ಹಿರಿಯ ಕ್ರಿಕೆಟಿಗ ಕಿರಣ್‌ ಮೋರೆ ವಿರುದ್ಧ ಬಲವಾದ ಆರೋಪ ಮಾಡಿದ್ದಾರೆ. ಬರೋಡ ರಣಜಿ ತಂಡಕ್ಕೆ ನೂತನ ಕೋಚ್‌ ಆಯ್ಕೆ ಮಾಡುವಾಗ ಮೋರೆ, ಸಣ್ಣತನ ತೋರಿದ್ದಾರೆಂದು ಬರೋಡ ಕ್ರಿಕೆಟ್‌ ಸಂಸ್ಥೆಗೆ ಇರ್ಫಾನ್‌ ಮೈಲ್‌ ಮಾಡಿದ್ದಾರೆ.

ಸ್ಥಳೀಯ ಮಾಜಿ ಕ್ರಿಕೆಟಿಗ ಕಾನರ್‌ ವಿಲಿಯಮ್ಸ್‌ರನ್ನು ತಂಡಕ್ಕೆ ಕೋಚ್‌ ಮಾಡಲು ಇರ್ಫಾನ್‌ ಶಿಫಾರಸು ಮಾಡಿದ್ದರು. ಆದರೆ ಮೋರೆ ಅದನ್ನು ಒಪ್ಪಲಿಲ್ಲ. ತನಗೆ ವಿಲಿಯಮ್ಸ್‌ ಹೆಲೋ ಹೇಳಲಿಲ್ಲವೆಂಬ ಕಾರಣವನ್ನಿಟ್ಟುಕೊಂಡು ಮೋರೆ, ವಿಲಿಯಮ್ಸ್‌ಗೆ ಕೋಚ್‌ ಸ್ಥಾನ ತಪ್ಪಿಸಿದ್ದಾರೆ. ಇದು ಬರೋಡ ಕ್ರಿಕೆಟ್‌ ಸಂಸ್ಥೆಯ ಅಧಃಪತನದ ಸಂಕೇತ ಎಂದು ಕಠಿಣವಾಗಿ ಹೇಳಿದ್ದಾರೆ.

ಸದ್ಯ ಬರೋಡ ಸಂಸ್ಥೆ ಮುಂದಿನ ರಣಜಿ ಋತುವಿಗೆ ಮುಕುಂದರ್‌ ಪರ್ಮಾರ್‌ರನ್ನು ಕೋಚ್‌ ಆಗಿ ಆಯ್ಕೆ ಮಾಡಿದೆ. ಅವರು ಗುಜರಾತ್‌ ಮಾಜಿ ಬ್ಯಾಟರ್‌ ಆಗಿ ಹೆಸರು ಮಾಡಿದ್ದಾರೆ.

ಈ ವಿವಾದಕ್ಕೆ ಸಂಬಂಧಪಟ್ಟಂತೆ ಇರ್ಫಾನ್‌ ಪಠಾಣ್‌ ಆಗಲೀ, ಕಿರಣ್‌ ಮೋರೆಯಾಗಲೀ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಬರೋಡ ಕ್ರಿಕಟ್‌ ಸಂಸ್ಥೆಯ ಅಭಿಪ್ರಾಯವೇನು ಎಂದೂ ಗೊತ್ತಾಗಿಲ್ಲ. ಆದರೆ ಇದು ಭಾರತ ಕ್ರಿಕೆಟ್‌ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ.