ಡೆಲ್ರೆ ಬೀಚ್‌ ಓಪನ್‌ ಟೆನಿಸ್‌: ಇಸ್ನರ್‌, ರಾನಿಕ್‌, ಸಾಕ್‌ಗೆ ಶಾಕ್‌

Team Udayavani, Feb 23, 2018, 6:40 AM IST

ಫ್ಲೋರಿಡಾ: “ಡೆಲ್ರೆ ಬೀಚ್‌ ಓಪನ್‌’ ಟೆನಿಸ್‌ ಪಂದ್ಯಾವಳಿಯ ಬುಧವಾರ ರಾತ್ರಿಯ ಸ್ಪರ್ಧೆಗಳಲ್ಲಿ ಆಘಾತಕಾರಿ ಫ‌ಲಿತಾಂಶ ದಾಖಲಾಗಿದೆ. ಅಮೆರಿಕದ ಜಾಕ್‌ ಸಾಕ್‌, ಜಾನ್‌ ಇಸ್ನರ್‌, ಕೆನಡಾದ ಮಿಲೋಸ್‌ ರಾನಿಕ್‌ ದ್ವಿತೀಯ ಸುತ್ತಿನಲ್ಲಿ ಸೋಲುಂಡು ನಿರ್ಗಮಿಸಿದ್ದಾರೆ.

ವಿಶ್ವದ 8ನೇ ರ್‍ಯಾಂಕಿಂಗ್‌ನ ಟೆನಿಸಿಗ ಜಾಕ್‌ ಸಾಕ್‌ ಅವರನ್ನು ಅಮೆರಿಕದವರೇ ಆದ ರೀಲಿ ಒಪೆಲ್ಕ 4-6, 7-5, 6-3 ಅಂತರದಿಂದ ಪರಾಭವಗೊಳಿಸಿದರು. 6 ಅಡಿ, 11 ಇಂಚು ಎತ್ತರದ ಒಪೆಲ್ಕ ಇದನ್ನೇ ಬಂಡವಾಳ ಮಾಡಿಕೊಂಡು ಸಾಕ್‌ಗೆ ಆಘಾತವಿತ್ತರು.

ಬಿಗ್‌ ಸರ್ವರ್‌ ಖ್ಯಾತಿಯ ಜಾನ್‌ ಇಸ್ನರ್‌ ಅವರನ್ನು ಜರ್ಮನಿಯ ಪೀಟರ್‌ ಗೊಜೋವಿಕ್‌ 3 ಸೆಟ್‌ಗಳ ಹೋರಾಟದ ಬಳಿಕ ಹಿಮ್ಮೆಟ್ಟಿಸುವಲ್ಲಿ ಯಶಸ್ವಿಯಾದರು. ಈ ಮೂರೂ ಸೆಟ್‌ ಟೈ-ಬ್ರೇಕರ್‌ಗೆ ವಿಸ್ತರಿಸಲ್ಪಟ್ಟಿತ್ತು. ಗೊಜೋವಿಕ್‌ ಗೆಲುವಿನ ಅಂತರ 7-6 (3), 6-7 (4), 7-6 (5).

ಮಿಲೋಸ್‌ ರಾನಿಕ್‌ ಅವರನ್ನು ಅಮೆರಿಕದ ಸ್ಟೀವ್‌ ಜಾನ್ಸನ್‌ 6-2, 6-4ರಿಂದ ಪರಾಭವಗೊಳಿಸಿದರು. ಇದು ರಾನಿಕ್‌ ವಿರುದ್ಧ ಜಾನ್ಸನ್‌ ಸಾಧಿಸಿದ ಮೊದಲ ಗೆಲುವು.