ಪ್ರೊ ಕಬಡ್ಡಿ ಪಂದ್ಯ: ಗುಜರಾತ್‌ ಜೈಂಟ್ಸ್‌ಗೆ ಆಘಾತವಿಕ್ಕಿದ ಜೈಪುರ್‌ ಪಿಂಕ್‌ ಪ್ಯಾಂಥರ್

Team Udayavani, Oct 15, 2022, 11:04 PM IST

ಬೆಂಗಳೂರು: ತೀರಾ ನಿಧಾನ ಗತಿಯ ಆಟಕ್ಕೆ ಸಾಕ್ಷಿಯಾದ ಶನಿವಾರದ ಮೊದಲ ಪ್ರೊ ಕಬಡ್ಡಿ ಪಂದ್ಯದಲ್ಲಿ ಜೈಪುರ್‌ ಪಿಂಕ್‌ ಪ್ಯಾಂಥರ್ 25-18 ಅಂತರದಿಂದ ಗುಜರಾತ್‌ ಜೈಂಟ್ಸ್‌ ತಂಡವನ್ನು ಕೆಡವಿತು.

ವಿರಾಮದ ವೇಳೆ ಜೈಪುರ್‌ 12-9 ಅಂತರದ ಸಣ್ಣ ಮುನ್ನಡೆಯಲ್ಲಿತ್ತು. ಎರಡೂ ತಂಡಗಳು ಡಿಫೆನ್ಸ್‌ಗೆ ಹೆಚ್ಚು ಒತ್ತು ಕೊಟ್ಟವು. ಜೈಪುರ್‌ ಪರ ರೈಡರ್‌ಗಳಾದ ರಾಕೇಶ್‌ ಚೌಧರಿ 5 ಅಂಕ, ಅರ್ಜುನ್‌ ದೇಶ್ವಾಲ್‌ 4 ಅಂಕ ಗಳಿಸಿದರು.
ದ್ವಿತೀಯಾರ್ಧದಲ್ಲಿ ಗುಜರಾತ್‌ ಡಿಫೆನ್ಸ್‌ ವಿಭಾಗದಲ್ಲಿ ತುಸು ಹಿನ್ನಡೆ ಅನುಭವಿಸಿತು. ಹೀಗಾಗಿ ಜೈಪುರದ ಬೆನ್ನು ಹತ್ತಲಾಗಲಿಲ್ಲ. ಇದು 4 ಪಂದ್ಯಗಳಲ್ಲಿ ಗುಜರಾತ್‌ಗೆ ಎದುರಾದ 2ನೇ ಸೋಲು. ಜೈಪುರ್‌ 4 ಪಂದ್ಯಗಳಲ್ಲಿ 3ನೇ ಜಯ ಸಾಧಿಸಿತು.

ಡೆಲ್ಲಿ ಸತತ 4ನೇ ಜಯ: ಇನ್ನೊಂದು ಪಂದ್ಯದಲ್ಲಿ ದಬಾಂಗ್‌ ಡೆಲ್ಲಿ 46-26 ಅಂಕಗಳ ಭಾರೀ ಅಂತರದಿಂದ ತೆಲುಗು ಟೈಟಾನ್ಸ್‌ಗೆ ಸೋಲುಣಿಸಿ ಅಜೇಯ ಓಟ ಮುಂದುವರಿಸಿತು. ಇದು ಡೆಲ್ಲಿ ಸಾಧಿಸಿದ ಸತತ 4ನೇ ಗೆಲುವು. ಡೆಲ್ಲಿ ನಾಯಕ ನವೀನ್‌ ಕುಮಾರ್‌ ಸರ್ವಾಧಿಕ 12 ಅಂಕ ಗಳಿಸಿದರು.