ವಿಶ್ವ ವನಿತಾ ಬಾಕ್ಸಿಂಗ್‌: ಜಮುನಾ ಬೋರೊ ಮುನ್ನಡೆ

Team Udayavani, Oct 5, 2019, 2:36 AM IST

ಹೊಸದಿಲ್ಲಿ: ರಶ್ಯದಲ್ಲಿ ಆರಂಭಗೊಂಡ ವನಿತಾ ವಿಶ್ವ ಬಾಕ್ಸಿಂಗ್‌ ಪಂದ್ಯಾವಳಿಯಲ್ಲಿ ಭಾರತದ ಜಮುನಾ ಬೋರೊ 54 ಕೆಜಿ ವಿಭಾಗದಲ್ಲಿ ಪ್ರಿ ಕ್ವಾ. ಫೈನಲ್‌ ತಲುಪಿದ್ದಾರೆ.

ಶುಕ್ರವಾರ ನಡೆದ ಸ್ಪರ್ಧೆಯಲ್ಲಿ ಜಮುನಾ ಬೋರೊ ಮಂಗೋಲಿಯಾದ ಮಿಶಿದ್ಮಾ ಎರ್ಡೆನೆದಲಾಯ್‌ ವಿರುದ್ಧ 5-0 ಅಂತರದ ಗೆಲುವು ಸಾಧಿಸಿದರು. ನಿಧಾನ ಗತಿಯ ಆರಂಭ ಪಡೆದ ಜಮುನಾ, ಬಳಿಕ ಮೇಲುಗೈ ಸಾಧಿಸುತ್ತ ಹೋದರು. ಕೊನೆಯ 3 ನಿಮಿಷಗಳಲ್ಲಂತೂ ಎದುರಾಳಿಗೆ ಜಮುನಾ ರನ್ನು ತಡೆಯಲು ಸಾಧ್ಯವೇ ಆಗಲಿಲ್ಲ. 22ರ ಹರೆಯದ ಅವರು ಅಸ್ಸಾಮ್‌ ರೈಫ‌ಲ್ಸ್‌ ನಲ್ಲಿ ಉದ್ಯೋಗಿಯಾಗಿದ್ದಾರೆ. ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಸ್ಪರ್ಧೆಗಿಳಿದದ್ದು ಇದೇ ಮೊದಲು.

ಜಮುನಾ ಬೋರೊ ಮುಂದಿನ ಸುತ್ತಿನಲ್ಲಿ ಆಲ್ಜೀರಿಯಾದ 5ನೇ ಶ್ರೇಯಾಂಕಿತೆ ಕ್ವಿದಾದ್‌ ಫ‌ೂ ವಿರುದ್ಧ ಸೆಣಸಲಿದ್ದಾರೆ. ಫ‌ೂ 2017ರ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನ‌ ಜಯಿಸಿದ್ದು, ಜಮುನಾಗೆ ಕಠಿನ ಸವಾಲೊಡ್ಡುವ ಸಾಧ್ಯತೆ ಇದೆ.