ಜೂ. 6:  ಭಾರತ-ನೇಪಾಲ ಸೌಹಾರ್ದ ಫ‌ುಟ್ಬಾಲ್‌ ಪಂದ್ಯ

Team Udayavani, May 18, 2017, 3:45 AM IST

ಹೊಸದಿಲ್ಲಿ: ಲೆಬನಾನ್‌ ವಿರುದ್ಧ ಸೌಹಾರ್ದ ಫ‌ುಟ್ಬಾಲ್‌ ಪಂದ್ಯ ರದ್ದಾದ ಬೆನ್ನಲ್ಲೇ ಜೂ. 6ರಂದು ಭಾರತ ತಂಡ ನೇಪಾಲ ವಿರುದ್ಧ ಆಡಲು ನಿರ್ಧರಿಸಿದೆ. ಈ ವಿಷಯವನ್ನು ಆಲ್‌ ನೇಪಾಲ ಫ‌ುಟ್ಬಾಲ್‌ ಅಸೋಸಿಯೇಷನ್‌ (ಎಎನ್‌ಎಫ್ಎ) ಅಧಿಕೃತ ವೆಬ್‌ಸೈಟ್‌ನಲ್ಲಿ ಖಚಿತಪಡಿಸಿದೆ.

ಭಾರತ ಎಎಫ್ಸಿ ಕಪ್‌ 2019 ಅರ್ಹತಾ ಫ‌ುಟ್ಬಾಲ್‌ ಕೂಟದ ಮೊದಲ ಪಂದ್ಯದಲ್ಲಿ ಲೆಬನಾನ್‌ ತಂಡವನ್ನು ಎದುರಿಸಬೇಕಿತ್ತು. ಆದರೆ ವೀಸಾ ಸಮಸ್ಯೆಯಿಂದ ಲೆಬನಾನ್‌ ತಂಡಕ್ಕೆ ಭಾರತಕ್ಕೆ ಆಗಮಿಸಲು ಸಾಧ್ಯವಾಗಲಿಲ್ಲ. ಹೀಗಾಗಿ ಪಂದ್ಯ ರದ್ದುಗೊಂಡಿತ್ತು. ಇದರ ಬದಲು ಭಾರತವೀಗ ನೇಪಾಲ ವಿರುದ್ಧ ಪಂದ್ಯವನ್ನು ಆಡಲು ಸಜ್ಜಾಗಿದೆ.

ಬಳಿಕ ಭಾರತ ಜೂ. 13ರಂದು ಕಿರ್ಗಿಸ್ಥಾನ ವಿರುದ್ಧ ಎಎಫ್ಸಿ ಅರ್ಹತಾ ಪಂದ್ಯದಲ್ಲಿ ಕಾದಾಟ ನಡೆಸಲಿದೆ. ಇತ್ತೀಚೆಗೆ ನಡೆದ ಸೌಹಾರ್ದ ಫ‌ುಟ್ಬಾಲ್‌ ಪಂದ್ಯದಲ್ಲಿ ಕಾಂಬೋಡಿಯಾ ಮತ್ತು ಮ್ಯಾನ್ಮಾರ್‌ ತಂಡದ ವಿರುದ್ಧ ಭಾರತ ಗೆಲುವು ಸಾಧಿಸಿತ್ತು. ಫಿಫಾ ರ್‍ಯಾಂಕಿಂಗ್‌ನಲ್ಲಿ ಅಗ್ರ 100ರೊಳಗೆ ಸ್ಥಾನ ಪಡೆದಿದ್ದನ್ನು ಇಲ್ಲಿ ಸ್ಮರಿಸಬಹುದು.