ಕಿವೀಸ್ ಗೂ ಆಘಾತ: ಮೊದಲೆರಡು ಏಕದಿನದಿಂದ ನಾಯಕ ವಿಲಿಯಮ್ಸನ್ ಔಟ್

Team Udayavani, Feb 4, 2020, 9:10 AM IST

ಹ್ಯಾಮಿಲ್ಟನ್: ಭಾರತದ ಆರಂಭಿಕ ಆಟಗಾರ ರೋಹಿತ್ ಶರ್ಮಾ ಗಾಯಗೊಂಡು ಕಿವೀಸ್ ಸರಣಿಯಿಂದ ಹೊರಬಿದ್ದ ನಂತರ ಇದೀಗ ಕಿವೀಸ್ ಗೂ ಅಂತಹುದೇ ಆಘಾತ ಕಾದಿದೆ. ಕಿವೀಸ್ ನಾಯಕ ಕೇನ್ ವಿಲಿಯಮ್ಸನ್ ಕೂಡಾ ಮೊದಲೆರಡು ಏಕದಿನ ಪಂದ್ಯದಿಂದ ಹೊರಗುಳಿಯಲಿದ್ದಾರೆ.

ಭುಜ ನೋವಿನಿಂದ ಕೊನೆಯ ಎರಡು ಟಿ20 ಪಂದ್ಯಗಳನ್ನು ತಪ್ಪಿಸಿಕೊಂಡಿದ್ದ ಕೇನ್ ವಿಲಿಯಮ್ಸನ್ ಮೊದಲೆರಡು ಏಕದಿನ ಪಂದ್ಯಗಳಿಗೂ ಅಲಭ್ಯರಾಗಲಿದ್ದಾರೆ ಎನ್ನಲಾಗಿದೆ. ವಿಲಿಯಮ್ಸನ್ ಬದಲಿಗೆ ಮಾರ್ಕ್ ಚಾಪ್ಮನ್ ತಂಡವನ್ನು ಸೇರಲಿದ್ದಾರೆ.

ಮೂರನೇ ಮತ್ತು ಅಂತಿಮ ಏಕದಿನ ಪಂದ್ಯಕ್ಕೆ ಕೇನ್ ವಿಲಿಯಮ್ಸನ್ ತಂಡವನ್ನು ಕೂಡಿಕೊಳ್ಳಲಿದ್ದಾರೆ. ಅಲ್ಲಿಯವರೆಗೆ ತಂಡವನ್ನು ವಿಕೆಟ್ ಕೀಪರ್ ಬ್ಯಾಟ್ಸಮನ್ ಟಾಮ್ ಲ್ಯಾಂಥಮ್ ಮುನ್ನಡೆಸಲಿದ್ದಾರೆ.

ಮೂರನೇ ಟಿ20 ಪಂದ್ಯದ ವೇಳೆ ಕೇನ್ ಭುಜ ನೋವಿಗೆ ಒಳಗಾಗಿದ್ದರು. ಆದರೆ ಅವರ ಎಕ್ಸ್ ರೇ ವರದಿಯಲ್ಲಿ ಯಾವುದೇ ಗಂಭೀರ ಗಾಯ ಕಂಡುಬಂದಿಲ್ಲ. ಆದರೂ ಮುಂದಿನ ಟೆಸ್ಟ್ ಸರಣಿಯನ್ನು ಪರಿಗಣಿಸಿ ಟೀಂ ಮ್ಯಾನೇಜ್ ಮೆಂಟ್ ವಿಲಿಯಮ್ಸನ್ ಗೆ ವಿಶ್ರಾಂತಿ ನೀಡಿದೆ.

ಮೊದಲ ಏಕದಿನ ಪಂದ್ಯ ಫೆಬ್ರವರಿ 5ರಂದು ಹ್ಯಾಮಿಲ್ಟನ್ ನಲ್ಲಿ ನಡೆಯಲಿದೆ.