ವನಿತಾ ಟಿ20 ವಿಶ್ವಕಪ್‌ : ಟ್ರೋಫಿ ಅನಾವರಣಗೊಳಿಸಿದ ಕರೀನಾ

ಮೆಲ್ಬರ್ನ್ ಸಮಾರಂಭದಲ್ಲಿ ಬಾಲಿವುಡ್‌ ನಟಿಯ ಮಿಂಚು

Team Udayavani, Nov 2, 2019, 5:38 AM IST

ಮೆಲ್ಬರ್ನ್: ಶುಕ್ರವಾರ ಮೆಲ್ಬರ್ನ್·ನಲ್ಲಿ ನಡೆದ ಸರಳ ಸಮಾರಂಭದಲ್ಲಿ ಬಾಲಿವುಡ್‌ ನಟಿ ಕರೀನಾ ಕಪೂರ್‌ ಖಾನ್‌ ಐಸಿಸಿ ವನಿತಾ ವಿಶ್ವಕಪ್‌ ಟಿ20 ಪಂದ್ಯಾವಳಿಯ ಟ್ರೋಫಿಯನ್ನು ಅನಾವರಣಗೊಳಿಸಿದರು. ಇದರೊಂದಿಗೆ ಆಸ್ಟ್ರೇಲಿಯದ ಆತಿಥ್ಯದಲ್ಲಿ ನಡೆಯುವ ಈ ಪ್ರತಿಷ್ಠಿತ ಕೂಟಕ್ಕೆ ಕ್ಷಣಗಣನೆ ಆರಂಭಗೊಂಡಿತು.

“ಬಾಲಿವುಡ್‌ ಸ್ಟಾರ್‌ ಕರೀನಾ ಕಪೂರ್‌ ವನಿತಾ ಟಿ20 ವಿಶ್ವಕಪ್‌ ಕ್ರಿಕೆಟ್‌ ಕೂಟದ ಕ್ಷಣಗಣನೆಗೆ ಚಾಲನೆ ನೀಡಿದ್ದಾರೆ. ಮುಂದಿನ ವರ್ಷದ ಅಂತಾರಾಷ್ಟ್ರೀಯ ಮಹಿಳಾ ದಿನದಂದು ಎಂಸಿಜಿಯಲ್ಲಿ ನಡೆಯುವ ಫೈನಲ್‌ನಲ್ಲಿ ಅವರೊಂದಿಗೆ ಯಾರಿರಬಹುದು?’ ಎಂದು ಐಸಿಸಿ ಟ್ವೀಟ್‌ ಮಾಡಿದೆ.

ಫೆ. 21ರಿಂದ ವಿಶ್ವಕಪ್‌
2020ರ ಫೆ. 21ರಿಂದ ವನಿತಾ ಟಿ20 ವಿಶ್ವಕಪ್‌ ಪಂದ್ಯಾವಳಿ ಆರಂಭವಾಗಲಿದೆ. ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್‌ ಆಸ್ಟ್ರೇಲಿಯ ಮತ್ತು ಭಾರತ ಮುಖಾಮುಖೀಯಾಗಲಿವೆ.

ಅರ್ಹತಾ ಸುತ್ತಿನಲ್ಲಿ ಗೆದ್ದು ಬಂದ ಬಾಂಗ್ಲಾದೇಶ ಮುಖ್ಯ ಸುತ್ತು ತಲುಪಿದ್ದು, “ಎ’ ವಿಭಾಗದಲ್ಲಿ ಸ್ಥಾನ ಪಡೆದಿದೆ. ಆತಿಥೇಯ ಆಸ್ಟ್ರೇಲಿಯ, ಭಾರತ, ನ್ಯೂಜಿಲ್ಯಾಂಡ್‌ ಮತ್ತು ಶ್ರೀಲಂಕಾ ಈ ವಿಭಾಗದ ಉಳಿದ ತಂಡಗಳು.

ಥಾಯ್ಲೆಂಡ್‌ 12 ವರ್ಷಗಳ ಬಳಿಕ ಮೊದಲ ಸಲ ವನಿತಾ ಟಿ20 ವಿಶ್ವಕಪ್‌ ಕೂಟದಲ್ಲಿ ಕಾಣಿಸಿಕೊಂಡಿದೆ. ಅದು ಇಂಗ್ಲೆಂಡ್‌, ದಕ್ಷಿಣ ಆಫ್ರಿಕಾ, ವೆಸ್ಟ್‌ ಇಂಡೀಸ್‌ ಮತ್ತು ಪಾಕಿಸ್ಥಾನದೊಂದಿಗೆ “ಬಿ’ ವಿಭಾಗದಲ್ಲಿ ಸ್ಥಾನ ಪಡೆದಿದೆ.ವೆಸ್ಟ್‌ ಇಂಡೀಸ್‌ನಲ್ಲಿ ನಡೆದ ಕಳೆದ ವಿಶ್ವಕಪ್‌ನಲ್ಲಿ ಮೊದಲ 8 ಸ್ಥಾನ ಪಡೆದ ತಂಡಗಳು ಈ ಕೂಟಕ್ಕೆ ನೇರ ಪ್ರವೇಶ ಪಡೆದಿವೆ.

ಮಾ. 8ರಂದು ಐತಿಹಾಸಿಕ ಮೆಲ್ಬರ್ನ್ ಕ್ರಿಕೆಟ್‌ ಗ್ರೌಂಡ್‌ನ‌ಲ್ಲಿ ಪ್ರಶಸ್ತಿ ಕಾಳಗ ಏರ್ಪಡಲಿದೆ. ಅಂದು ವಿಶ್ವ ಮಹಿಳಾ ದಿನವೂ ಆಗಿದೆ.