Karnataka Cricket; ಯರೇಗೌಡ ಮತ್ತೆ ರಾಜ್ಯ ತಂಡದ ಕೋಚ್‌

Team Udayavani, Aug 17, 2024, 12:00 AM IST

ಬೆಂಗಳೂರು: ಕರ್ನಾಟಕದ ಮಾಜಿ ಆಟಗಾರ ಕೆ. ಯರೇಗೌಡ ಮತ್ತೂಮ್ಮೆ ರಾಜ್ಯ ಕ್ರಿಕೆಟ್‌ ತಂಡದ ಕೋಚ್‌ ಆಗಿ ನೇಮಕಗೊಂಡಿದ್ದಾರೆ. ಅವರು ಪಿ.ವಿ. ಶಶಿಕಾಂತ್‌ ಸ್ಥಾನವನ್ನು ತುಂಬಲಿದ್ದಾರೆ. ಶಶಿಕಾಂತ್‌ ತ್ರಿಪುರ ತಂಡದ ಕೋಚ್‌ ಆಗಿ ತೆರಳಿದ್ದಾರೆ.ಕರ್ನಾಟಕ ವನಿತಾ ತಂಡದ ಕೋಚ್‌ ಆಗಿ ಕರುಣಾ ಜೈನ್‌ ಅವರನ್ನು ನೇಮಿಸಲಾಗಿದೆ.

ಇದಕ್ಕೂ ಮುನ್ನ 2018ರಿಂದ 4 ವರ್ಷಗಳ ಕಾಲ ಯರೇಗೌಡ ರಾಜ್ಯ ಸೀನಿಯರ್‌ ತಂಡದ ಕೋಚ್‌ ಆಗಿದ್ದರು. ಕಳೆದ ಸಲ ಅವರು ಅಂಡರ್‌-23 ತಂಡದ ತರಬೇತುದಾರರಾಗಿದ್ದರು. ಸಿ.ಕೆ. ನಾಯ್ಡು ಟ್ರೋಫಿ ಚಾಂಪಿಯನ್‌ಶಿಪ್‌ ಗೆಲ್ಲುವಲ್ಲಿ ಮಹತ್ವದ ಪಾತ್ರ ವಹಿಸಿದ್ದರು. ಈಗ ಸೋಮಶೇಖರ್‌ ಎನ್‌. ಶಿರಗುಪ್ಪಿ ಅವರನ್ನು ಅಂಡರ್‌-23 ತಂಡದ ಕೋಚ್‌ ಆಗಿ ನೇಮಿಸಲಾಗಿದೆ.

ಯರೇಗೌಡ ಮೊದಲ ಅವಧಿಯಲ್ಲಿ ಕೋಚ್‌ ಆಗಿದ್ದಾಗ ಕರ್ನಾಟಕ ತಂಡ ರಣಜಿ ಟ್ರೋಫಿ ಕ್ವಾರ್ಟರ್‌ ಫೈನಲ್‌, ವಿಜಯ್‌ ಹಜಾರೆ ಟ್ರೋಫಿ ಸೆಮಿಫೈನಲ್‌ ಪ್ರವೇಶಿಸಿತ್ತು.

ಮಧ್ಯಮ ಕ್ರಮಾಂಕದ ಬ್ಯಾಟರ್‌ ಆಗಿದ್ದ ಯರೇಗೌಡ, ಪ್ರಥಮ ದರ್ಜೆ ಕ್ರಿಕೆಟ್‌ನ 212 ಇನ್ನಿಂಗ್ಸ್‌ಗಳಲ್ಲಿ 7,650 ರನ್‌ ಗಳಿಸಿದ್ದಾರೆ.

ಕರ್ನಾಟಕ ತಂಡದ ಕೋಚಿಂಗ್‌ ಸಿಬಂದಿ·ಸೀನಿಯರ್‌ ತಂಡ: ಕೆ. ಯರೇಗೌಡ (ಪ್ರಧಾನ ಕೋಚ್‌), ಮನ್ಸೂರ್‌ ಅಲಿ ಖಾನ್‌ (ಬೌಲಿಂಗ್‌ ಕೋಚ್‌), ಶಬರೀಶ್‌ ಪಿ. ಮೋಹನ್‌ (ಫೀಲ್ಡಿಂಗ್‌ ಕೋಚ್‌).

·ಅಂಡರ್‌-23: ಸೋಮಶೇಖರ್‌ ಎನ್‌. ಶಿರಗುಪ್ಪಿ (ಪ್ರಧಾನ ಕೋಚ್‌), ರೋಹಿತ್‌ ಸಭರ್ವಾಲ್‌ (ಫೀಲ್ಡಿಂಗ್‌ ಕೋಚ್‌).
·ಅಂಡರ್‌-19: ಕೆ.ಬಿ. ಪವನ್‌ (ಪ್ರಧಾನ ಕೋಚ್‌), ಎಸ್‌.ಎಲ್‌. ಅಕ್ಷಯ್‌ (ಬೌಲಿಂಗ್‌ ಕೋಚ್‌).
·ಅಂಡರ್‌-16 ಮತ್ತು ಅಂಡರ್‌-14: ಕುಣಾಲ್‌ ಕಪೂರ್‌ (ಪ್ರಧಾನ ಕೋಚ್‌), ಆದಿತ್ಯ ಬಿ. ಸಾಗರ್‌ (ಸಹಾಯಕ ಕೋಚ್‌).