ಖೇಲೋ ಇಂಡಿಯಾ ಈಜು: ಕಿನ್ನಿಗೋಳಿ ಮೂಲದ ಅಪೇಕ್ಷಾಗೆ ಚಿನ್ನ

Team Udayavani, Jan 14, 2019, 1:05 AM IST

ಪುಣೆ: ಇಲ್ಲಿ ನಡೆಯುತ್ತಿರುವ ಖೇಲೋ ಇಂಡಿಯಾ ಕ್ರೀಡಾಕೂಟದ ಅಂಡರ್‌-17 ವಿಭಾಗದ ಬಾಲಕಿಯರ 400 ಮೀ. ಮಿಡ್ಲೆ ಈಜು ಸ್ಪರ್ಧೆಯಲ್ಲಿ ಮಹಾರಾಷ್ಟ್ರವನ್ನು ಪ್ರತಿನಿಧಿಸಿದ, ಕಿನ್ನಿಗೋಳಿ ಮೂಲದ ಅಪೇಕ್ಷಾ ಫೆರ್ನಾಂಡಿಸ್‌ ಚಿನ್ನದ ಪದಕ ಜಯಿಸಿದ್ದಾರೆ. ಈ ಕೂಟದಲ್ಲಿ ಚಿನ್ನ ಗೆದ್ದ ಅತೀ ಕಿರಿಯ ಸಾಧಕಿ ಎಂಬುದು ಇವರ ಹೆಗ್ಗಳಿಕೆ. ಸೋಮವಾರ ನಡೆಯುವ 200 ಮೀ. ಫ್ರೀಸ್ಟೈಲ್‌ ಈಜು ಸ್ಪರ್ಧೆಯಲ್ಲೂ ಅಪೇಕ್ಷಾ ಸ್ಪರ್ಧಿಸಲಿದ್ದಾರೆ.

ಕೊನ್ನಿಗೋಳಿ ದಾಮಸ್‌ಕಟ್ಟೆ ಸಮೀಪದ ಅರಸರಗುತ್ತಿನ ಬಳಿಯ ಡಾ| ಪ್ರೋ. ಬೇಲನ್‌ ಫೆರ್ನಾಂಡೀಸ್‌-ಶ್ಯಾಲೆಟ್‌ ಫೆರ್ನಾಂಡೀಸ್‌ ದಂಪತಿಯ ಪುತ್ರಿಯಾಗಿರುವ ಅಪೇಕ್ಷಾ ಮುಂಬಯಿಯ ಪೊವಾಯಿಯ “ಬಾಂಬೆ ಸ್ಕಾಟಿಷ್‌ ಸ್ಕೂಲ್‌’ನಲ್ಲಿ 8ನೇ ತರಗತಿ ವಿದ್ಯಾರ್ಥಿಯಾಗಿದ್ದಾರೆ.

ಕಳೆದ ವರ್ಷಾಂತ್ಯ ಸ್ಕೂಲ್‌ ಗೇಮ್ಸ್‌ ಫೆಡರೇಶನ್‌ ಆಫ್ ಇಂಡಿಯಾ ವತಿಯಿಂದ ಹೊಸದಿಲ್ಲಿಯಲ್ಲಿ ನಡೆದ ರಾಷ್ಟ್ರೀಯ ಈಜು ಕೂಟದ 200 ಮೀ. ಬಟರ್‌ಫ್ಲೈ, 200 ಮೀ. ಮಿಡ್ಲೆ ಹಾಗೂ 200 ಮೀ. ಬ್ರೆಸ್ಟ್‌ ಸ್ಟ್ರೋಕ್‌ ಸ್ಪರ್ಧೆಗಳಲ್ಲಿ ನೂತನ ದಾಖಲೆಯೊಂದಿಗೆ ಚಿನ್ನ ಗೆದ್ದ ಸಾಧನೆ ಅಪೇಕ್ಷಾ ಅವರದ್ದಾಗಿದೆ.