ಐಪಿಎಲ್ 2022: ಉದ್ಘಾಟನಾ ಪಂದ್ಯದಲ್ಲಿ ಧೋನಿ ವರ್ಸಸ್ ಅಯ್ಯರ್

Team Udayavani, Feb 28, 2022, 8:33 AM IST

ನವದೆಹಲಿ: ಈ ಬಾರಿಯ ಐಪಿಎಲ್‌ ಕೂಟ ಮಾ.26ಕ್ಕೆ ಆರಂಭವಾಗಲಿರುವುದು ಎಲ್ಲರಿಗೂ ಗೊತ್ತಿದೆ. ಹೊಸ ವಿಷಯವೇನೆಂದರೆ ಉದ್ಘಾಟನಾ ಪಂದ್ಯ ಚೆನ್ನೈ ಕಿಂಗ್ಸ್‌ ಮತ್ತು ಕೋಲ್ಕತ ನೈಟ್‌ ರೈಡರ್ಸ್‌ ನಡುವೆ ನಡೆಯಲಿದೆ.

ಮುಂಬೈನ ಮೂರು ಮೈದಾನಗಳಲ್ಲಿ ಒಟ್ಟು 55 ಪಂದ್ಯ ನಡೆಯಲಿದೆ. 15 ಕ್ರಿಕೆಟ್‌ ಪಂದ್ಯ ಮಹಾರಾಷ್ಟ್ರ ಕ್ರಿಕೆಟ್‌ ಸಂಸ್ಥೆಯ ವ್ಯಾಪ್ತಿಯಲ್ಲಿ ಬರುವ ಪುಣೆಯಲ್ಲಿ ನಡೆಯಲಿದೆ. ಪ್ಲೇಆಫ್ ಪಂದ್ಯಗಳು ಬಹುಶಃ ಅಹ್ಮದಾಬಾದ್‌ನಲ್ಲಿ ನಡೆಯಬಹುದು. ಅಷ್ಟಲ್ಲದೇ ಇನ್ನೊಂದು ವಿಶೇಷ ಸೌಲಭ್ಯವೂ ಆಟಗಾರರಿಗೆ ಲಭಿಸಲಿದೆ.

ಮುಂಬೈನಲ್ಲಿ ವಿಪರೀತ ಟ್ರಾಫಿಕ್‌ ಸಮಸ್ಯೆಯಿದೆ. ಒಂದು ವೇಳೆ ಅಲ್ಲಿ ಸಿಕ್ಕಿಕೊಂಡರೆ ಕೆಲವು ಗಂಟೆಗಳ ಕಾಲ ಒದ್ದಾಡಬೇಕಾದೀತು. ಇದಕ್ಕಾಗಿಯೇ ಮಹಾರಾಷ್ಟ್ರ ಸರ್ಕಾರ ಈ ಆಟಗಾರರಿಗೆ ವಿಐಪಿಗಳು, ಆ್ಯಂಬುಲೆನ್ಸ್‌ ಗಳಿಗೆ ನೀಡುವ ವಿಶೇಷ ಸೌಲಭ್ಯವನ್ನು ಘೋಷಿಸಿದೆ. ಅಂದರೆ ಐಪಿಎಲ್‌ ತಂಡಗಳಿರುವ ಬಸ್‌ಗಳು ಬಂದಾಗ ಬೇಗಬೇಗ ಟ್ರಾಫಿಕ್ಕನ್ನು ತೆರವು ಮಾಡಲಾಗುತ್ತದೆ. ಇದಕ್ಕೆ ಮುಂಬೈ ನಾಗರಿಕರು ಹೇಗೆ ಪ್ರತಿಕ್ರಿಯಿಸುತ್ತಾರೆಂದು ಕಾದು ನೋಡಬೇಕು.