ವೆಂಗ್‌ಸರ್ಕಾರ್‌ ದಾಖಲೆ ಮುರಿದ ರಾಹುಲ್‌

Team Udayavani, Sep 13, 2018, 6:15 AM IST

ಲಂಡನ್‌: ಟೆಸ್ಟ್‌ ಪಂದ್ಯದ ನಾಲ್ಕನೇ ಇನ್ನಿಂಗ್ಸ್‌ನಲ್ಲಿ ಗರಿಷ್ಠ ರನ್‌ ಪೇರಿಸುವ ಮೂಲಕ ಆರಂಭಿಕ ಆಟಗಾರ ಕೆಎಲ್‌ ರಾಹುಲ್‌ ಅವರು ಸಚಿನ್‌ ತೆಂಡುಲ್ಕರ್‌ ಮತ್ತು ವಿರಾಟ್‌ ಕೊಹ್ಲಿ ಅವರ ಸಾಧನೆಯನ್ನು ಹಿಂದಿಕ್ಕಿದರು.

ಗೆಲ್ಲಲು 464 ರನ್‌ ಗಳಿಸುವ ಗುರಿ ಪಡೆದ ಭಾರತ ಒಂದು ಹಂತದಲ್ಲಿ  ಕೇವಲ 2 ರನ್ನಿಗೆ 3 ಅಮೂಲ್ಯ ವಿಕೆಟ್‌ ಕಳೆದುಕೊಂಡು ಒದ್ದಾಡುತ್ತಿತ್ತು. ಐದನೇ ದಿನ ರಾಹುಲ್‌ ಮತ್ತು ಪಂತ್‌ ಅವರ ಅಮೋಘ ಬ್ಯಾಟಿಂಗ್‌ನಿಂದಾಗಿ ಭಾರತ ಡ್ರಾಗೊಳಿಸಲು ಪ್ರಯತ್ನಿಸಿತ್ತು. ಆದರೆ ಟೀ ವಿರಾಮದ ಬಳಿಕ ಹಠಾತ್‌ ಕುಸಿತ ಕಂಡ ಭಾರತ 118 ರನ್ನಿನಿಂದ ಪಂದ್ಯವನ್ನು ಕಳೆದುಕೊಂಡಿತು.

ಅಂತಿಮ ದಿನದ ಎರಡು ಅವಧಿಯಲ್ಲಿ ಪಂತ್‌ ಜತೆ ಅಮೋಘವಾಗಿ ಆಡಿದ ರಾಹುಲ್‌ 224 ಎಸೆತ ಎದುರಿಸಿ 149 ರನ್‌ ಸಿಡಿಸಿದರಲ್ಲದೇ ನಾಲ್ಕನೇ ಇನ್ನಿಂಗ್ಸ್‌ನಲ್ಲಿ 146 ರನ್‌  ಪೇರಿಸಿದ ದಿಲೀಪ್‌ ವೆಂಗ್‌ಸರ್ಕಾರ್‌ ಅವರ ಸಾಧನೆಯನ್ನು ಹಿಂದಿಕ್ಕಿದರು. 141 ರನ್‌ ಹೊಡೆದ ವಿರಾಟ್‌ ಕೊಹ್ಲಿ  ಮೂರನೇ ಸ್ಥಾನದಲ್ಲಿದ್ದರೆ ಸಚಿನ್‌ ತೆಂಡುಲ್ಕರ್‌ (136) ಮತ್ತು ವಿಜಯ್‌ ಹರಾರೆ (122) ಅನಂತರದ ಸ್ಥಾನದಲ್ಲಿದ್ದಾರೆ.