‌ಕೊಹ್ಲಿ, ರಹಾನೆ ಅರ್ಧಶತಕ: ಭಾರತದ ಹಿಡಿತದಲ್ಲಿ ಆಂಟಿಗುವಾ ಟೆಸ್ಟ್

Team Udayavani, Aug 25, 2019, 7:52 AM IST

ಆಂಟಿಗುವಾ: ದ್ವಿತೀಯ ಇನ್ನಿಂಗ್ಸ್‌ ನಲ್ಲಿ ನಾಯಕ ವಿರಾಟ್‌ ಕೊಹ್ಲಿ ಮತ್ತು ಉಪನಾಯಕ ಅಜಿಂಕ್ಯ ರಹಾನೆಯ ಅರ್ಧ ಶತಕದ ನೆರವಿನಿಂದ ಭಾರತ ಮುನ್ನಡೆ ಸಾಧಿಸಿದೆ. ದ್ವಿತೀಯ ಇನ್ನಿಂಗ್ಸ್‌ ನಲ್ಲಿ ಮೂರು ವಿಕೆಟ್‌ ನಷ್ಟಕ್ಕೆ 185 ರನ್‌ ಗಳಿಸಿರುವ ಭಾರತ ಒಟ್ಟಾರೆ 260 ರನ್‌ ಮುನ್ನಡೆ ಹೊಂದಿದೆ.

ದ್ವಿತೀಯ ದಿನದಾಟದ ಅಂತ್ಯಕ್ಕೆ ಎಂಟು ವಿಕೆಟ್‌ ಗೆ 189 ರನ್‌ ಗಳಿಸಿದ್ದಲ್ಲಿಂದ ಮೂರನೇ ದಿನದಾಟ ಆರಂಭಿಸಿದ ವಿಂಡೀಸ್‌ 222 ರ್‌ ಗೆ ಸರ್ವ ಪತನ ಕಂಡಿತು. ಅಜೇಯರಾಗಿದ್ದ ಜೇಸನ್‌ ಹೋಲ್ಡರ್‌ 39 ರನ್‌ ಗಳಿಸಿ ಶಮಿಗೆ ವಿಕೆಟ್‌ ಒಪ್ಪಿಸಿದರೆ, ಕಮಿನ್ಸ್‌ ವಿಕೆಟ್‌ ಜಡೇಜಾ ಪಾಲಾಯಿತು. ಹೀಗಾಗಿ ಮೊದಲ ಇನ್ನಿಂಗ್ಸ್‌ ನಲ್ಲಿ ಭಾರತಕ್ಕೆ 75 ರನ್‌ ಮುನ್ನಡೆ ದೊರಕಿತು.

ಎರಡನೇ ಇನ್ನಿಂಗ್ಸ್‌ ಆರಂಭಿಸಿದ ಭಾರತಕ್ಕೆ ಕನ್ನಡಿಗ ಆರಂಭಿಕ ಜೋಡಿಯಿಂದ ಉತ್ತಮ ಆರಂಬ ಸಿಗಲಿಲ್ಲ. ತಂಡದ ಮೊತ್ತ 30 ರನ್‌ ಆಗುವಷ್ಟರಲ್ಲಿ 16 ರನ್‌ ಗಳಿಸಿದ್ದ ಮಯಾಂಕ್‌, ರೋಸ್ಟನ್‌ ಚೇಸ್‌ ಎಲ್‌ ಬಿ ಬಲೆಗೆ ಬಿದ್ದರು. ಉತ್ತಮ ಆರಂಭ ಪಡೆದ ರಾಹುಲ್‌ ಮತ್ತೆ ದೊಡ್ಡ ಮೊತ್ತ ಕಲೆಹಾಕುವಲ್ಲಿ ವಿಫಲರಾದರು. ರಾಹುಲ್‌ ಗಳಿಕೆ 38 ರನ್.

ಭಾರತದ ಆಧಾರ ಸ್ಥಂಭ ಎಂಬ ಖ್ಯಾತಿಯ ಚೇತೇಶ್ವರ ಪೂಜಾರ ಈ ಪಂದ್ಯದಲ್ಲಿ ಮತ್ತೆ ವೈಫಲ್ಯ ಅನುಭವಿಸಿದರು. ಒಂದು ಹಂತದಲ್ಲಿ 81 ರನ್‌ ಗೆ ಮೂರು ವಿಕೆಟ್‌ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಭಾರತಕ್ಕೆ ಆಧಾರವಾದವರು ನಾಯಕ ವಿರಾಟ್‌ ಕೊಹ್ಲಿ ಮತ್ತು ಅಜಿಂಕ್ಯ ರಹಾನೆ. ಇಬ್ಬರೂ ಅಜೇಯ ಅರ್ಧಶತಕ ಬಾರಿಸಿ ತಂಡವನ್ನು ಸುಸ್ಥಿತಿಗೆ ತಂದರು. ಅಂತಿಮವಾಗಿ ಭಾರತ ಮೂರು ವಿಕೆಟ್‌ ನಷ್ಟಕ್ಕೆ 185 ರನ್‌ ಗಳಿಸಿ ಆಡುತ್ತಿದೆ.