ಟಿ20 ರ್‍ಯಾಂಕಿಂಗ್‌: 10ಕ್ಕೆ ಕುಸಿದ ಕೊಹ್ಲಿ

Team Udayavani, Feb 18, 2020, 6:50 AM IST

ದುಬಾೖ: ಸೋಮವಾರ ಪ್ರಕಟಗೊಂಡ ಐಸಿಸಿ ಟಿ20 ಬ್ಯಾಟಿಂಗ್‌ ರ್‍ಯಾಂಕಿಂಗ್‌ ಯಾದಿಯಲ್ಲಿ ಭಾರತದ ನಾಯಕ ವಿರಾಟ್‌ ಕೊಹ್ಲಿ 10ನೇ ಸ್ಥಾನಕ್ಕೆ ಕುಸಿದಿದ್ದಾರೆ. ಕೆ.ಎಲ್‌. ರಾಹುಲ್‌ 2ನೇ ಸ್ಥಾನ ಕಾಯ್ದುಕೊಂಡಿದ್ದಾರೆ.
ದಕ್ಷಿಣ ಆಫ್ರಿಕಾ-ಇಂಗ್ಲೆಂಡ್‌ ತಂಡಗಳ 3 ಪಂದ್ಯಗಳ ಸರಣಿ ಬಳಿಕ ರ್‍ಯಾಂಕಿಂಗ್‌ ಯಾದಿಯನ್ನು ಪರಿಷ್ಕರಿಸಲಾಯಿತು. ಪಾಕಿಸ್ಥಾನದ ಬಾಬರ್‌ ಆಜಂ ಅಗ್ರಸ್ಥಾನದಲ್ಲಿ ಮುಂದುವರಿದಿದ್ದಾರೆ. ಬಾಬರ್‌ ಮತ್ತು ರಾಹುಲ್‌ ನಡುವೆ 56 ಅಂಕಗಳ ಅಂತರವಿದೆ.

ನ್ಯೂಜಿಲ್ಯಾಂಡ್‌ ಸರಣಿ ಬಳಿಕ ವಿರಾಟ್‌ ಕೊಹ್ಲಿ 9ನೇ ಸ್ಥಾನದಲ್ಲಿದ್ದರು. ಈಗ ಈ ಸ್ಥಾನ ಇಯಾನ್‌ ಮಾರ್ಗನ್‌ ಪಾಲಾಗಿದೆ. ಅವರು ಆಫ್ರಿಕಾ ವಿರುದ್ಧದ 3 ಪಂದ್ಯಗಳ ಸರಣಿಯಲ್ಲಿ 136 ರನ್‌ ಬಾರಿಸಿ ಪ್ರಗತಿ ಸಾಧಿಸಿದರು. ಕೊಹ್ಲಿ ಒಂದು ಸ್ಥಾನದ ಕುಸಿತ ಅನುಭವಿಸಿದರು. ರೋಹಿತ್‌ ಶರ್ಮ 11ನೇ ಸ್ಥಾನದಲ್ಲಿದ್ದಾರೆ.

ಬೌಲಿಂಗ್‌ ರ್‍ಯಾಂಕಿಂಗ್‌ನಲ್ಲಿ ಅಫ್ಘಾನಿಸ್ಥಾನದ ರಶೀದ್‌ ಖಾನ್‌ ಮತ್ತು ಮುಜೀಬುರ್‌ ರೆಹಮಾನ್‌ ಮೊದಲೆರಡು ಸ್ಥಾನದಲ್ಲಿದ್ದಾರೆ. ಟಾಪ್‌-10 ಯಾದಿಯಲ್ಲಿ ಭಾರತದ ಯಾವುದೇ ಬೌಲರ್‌ ಇಲ್ಲ.

ಟಿ20 ಆಲ್‌ರೌಂಡರ್‌ ವಿಭಾಗದ ಅಗ್ರಸ್ಥಾವನ್ನು ಕಾಯ್ದುಕೊಳ್ಳುವಲ್ಲಿ ಅಫ್ಘಾನಿಸ್ಥಾನದ ಮೊಹಮ್ಮದ್‌ ನಬಿ ಯಶಸ್ವಿಯಾಗಿದ್ದಾರೆ.