ಆಸೀಸ್‌ ನಾಯಕನಿಗೆ ಕೊಹ್ಲಿ ಅಗೌರವ: ಮಿಚೆಲ್‌ ಜಾನ್ಸನ್‌

Team Udayavani, Dec 20, 2018, 6:15 AM IST

ಪರ್ತ್‌: ಆಸ್ಟ್ರೇಲಿಯದ ಮಾಜಿ ವೇಗದ ಬೌಲರ್‌ ಮಿಚೆಲ್‌ ಜಾನ್ಸನ್‌, ಭಾರತ ಕ್ರಿಕೆಟ್‌ ತಂಡದ ನಾಯಕ ವಿರಾಟ್‌ ಕೊಹ್ಲಿ ವರ್ತನೆನ್ನು ಟೀಕಿಸಿದ್ದಾರೆ.

ಪರ್ತ್‌ ಟೆಸ್ಟ್‌ ಮುಕ್ತಾಯದ ಅನಂತರ ಆಸ್ಟ್ರೇಲಿಯ ಕ್ರಿಕೆಟ್‌ ತಂಡದ ನಾಯಕ ಟಿಮ್‌ ಪೇನ್‌ಅವರ  ಕೈಕುಲುಕುವಾಗ ಕೊಹ್ಲಿ ವರ್ತನೆ ಸಮರ್ಪಕವಾಗಿರಲಿಲ್ಲ. ಅವರು ಪೇನ್‌ ಕಣ್ಣಲ್ಲಿ ಕಣ್ಣಿಟ್ಟು ನೋಡಲಿಲ್ಲ, ಇದು ಅಗೌರವದ ವರ್ತನೆ ಎಂದು ಜಾನ್ಸನ್‌ ಹೇಳಿದ್ದಾರೆ.

ಪಂದ್ಯ ಮುಗಿದ ಅನಂತರ ನೀವು ಎದುರಾಳಿಯ ಕಣ್ಣಲ್ಲಿ ಕಣ್ಣಿಟ್ಟು ಕೈಕುಲುಕುವ ಮನಃಸ್ಥಿತಿ ಹೊಂದಿರಬೇಕು. ಕೊಹ್ಲಿ, ಪೇನ್‌ ಅವರ ಕೈಕುಲುಕುತ್ತಿದ್ದರೂ ದೃಷ್ಟಿ ಇನ್ನೆಲ್ಲೋ ಇತ್ತು. ವಿರಾಟ್‌ ಕೊಹ್ಲಿ ಎಂಬ ಹೆಸರಿನ ಕಾರಣಕ್ಕೆ ಮಾತ್ರ ಅವರು ಹೀಗೆಲ್ಲ ಮಾಡಿ ಬಚಾವಾಗುತ್ತಿದ್ದಾರೆ. ಬೇರೆ ಆಟಗಾರರಿಗೆ ಇದು ಸಾಧ್ಯವಿಲ್ಲ ಎನ್ನುವುದು ಜಾನ್ಸನ್‌ ಅಭಿಪ್ರಾಯ.

ಈ ಪ್ರವಾಸಕ್ಕೆ ಮುನ್ನ ಕೊಹ್ಲಿ, “ನಾನು ಬದಲಾಗಿದ್ದೇನೆ. ಅನುಭವಗಳ ಅನಂತರ ನನ್ನ ಯೋಚನೆ ಭಿನ್ನವಾಗಿದೆ ಎಂದಿದ್ದರು. ಆದರೆ ಈಗಿನ ಅವರ ವರ್ತನೆ ನೋಡಿದರೆ ಅವರಲ್ಲಿ ಯಾವ ಬದಲಾವಣೆಯೂ ಆಗಿಲ್ಲ ಎನ್ನುವುದು ಸ್ಪಷ್ಟವಾಗಿದೆ’ ಎಂದು ಜಾನ್ಸನ್‌ ಕುಟುಕಿದ್ದಾರೆ.