ಕೊರಿಯಾ ಓಪನ್‌: ಸಿಂಧು ಮೇಲೆ ಭರವಸೆ

Team Udayavani, Sep 24, 2019, 5:20 AM IST

ಇಂಚೆಯಾನ್‌: ವಿಶ್ವ ಚಾಂಪಿಯನ್‌ ಕಿರೀಟ ಏರಿಸಿಕೊಂಡ ಬಳಿಕ “ಚೀನ ಓಪನ್‌’ನಿಂದ ಬೇಗನೇ ಹೊರಬಿದ್ದ ಪಿ.ವಿ. ಸಿಂಧು ಮುಂದೆ ಈಗ ಮತ್ತೂಂದು ಸವಾಲು ಎದುರಾಗಿದೆ. ಮಂಗಳವಾರದಿಂದ “ಕೊರಿಯಾ ಓಪನ್‌ ಸೂಪರ್‌-500 ಬ್ಯಾಡ್ಮಿಂಟನ್‌’ ಪಂದ್ಯಾವಳಿ ಆರಂಭವಾಗಲಿದ್ದು, ಪ್ರಸಕ್ತ ಋತುವಿನ ಮೊದಲ ಬಿಡಬ್ಲ್ಯುಎಫ್ ವರ್ಲ್ಡ್
ಟೂರ್‌ ಪ್ರಶಸ್ತಿ ಭಾರತೀಯಳಿಗೆ ಒಲಿದೀತೇ ಎಂಬುದೊಂದು ಕುತೂಹಲ.

2017ರಲ್ಲಿ ಕೊರಿಯಾ ಓಪನ್‌ ಚಾಂಪಿಯನ್‌ ಆಗಿದ್ದ ಪಿ.ವಿ. ಸಿಂಧು, 400,000 ಡಾಲರ್‌ ಬಹುಮಾನ ಮೊತ್ತದ ಈ ಟೂರ್ನಿಯ ಮೊದಲ ಪಂದ್ಯದಲ್ಲಿ ಚೀನೀ ಮೂಲದ ಅಮೆರಿಕನ್‌ ಆಟಗಾರ್ತಿ ಬೀವೆನ್‌ ಜಾಂಗ್‌ ವಿರುದ್ಧ ಆಡಲಿದ್ದಾರೆ. ಬಸೆಲ್‌ ವಿಶ್ವ ಚಾಂಪಿಯನ್‌ಶಿಪ್‌ ಪ್ರಶಸ್ತಿಯ ಹಾದಿಯಲ್ಲಿ ಜಾಂಗ್‌ ಅವರಿಗೆ ಸಿಂಧು ಸೋಲಿನ ರುಚಿ ತೋರಿಸಿದ್ದರು.

ಮೊದಲ ಸುತ್ತು ದಾಟಿದರೆ ಸಿಂಧು ಮತ್ತೆ ಥಾಯ್ಲೆಂಡ್‌ನ‌ ಪೊರ್ಣಪವೀ ಚುಚುವಾಂಗ್‌ ಅವರನ್ನು ಎದುರಿಸುವ ಸಾಧ್ಯತೆ ಇದೆ. ಚೀನ ಓಪನ್‌ನಲ್ಲಿ ಚುಚುವಾಂಗ್‌ ಅವರೇ ಭಾರತೀಯ ಆಟಗಾರ್ತಿಯನ್ನು ಹೊರದಬ್ಬಿದ್ದರು.

ಸೈನಾ ಕೂಡ ಕಣದಲ್ಲಿ
8ನೇ ಶ್ರೇಯಾಂಕದ ಸೈನಾ ನೆಹ್ವಾಲ್‌ ಕೂಡ ಕಣದಲ್ಲಿದ್ದಾರೆ. ಆದರೆ ಇತ್ತೀಚಿನ ಗಾಯದ ಸಮಸ್ಯೆಗಳು ಅವರ ಫಾರ್ಮ್ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿವೆ. ಕಳೆದ ವಾರದ ಚೀನ ಓಪನ್‌ ಸೇರಿದಂತೆ ಮಲೇಶ್ಯ ಓಪನ್‌, ನ್ಯೂಜಿಲ್ಯಾಂಡ್‌ ಓಪನ್‌, ಸುದೀರ್ಮನ್‌ ಕಪ್‌ ಕೂಟಗಳಲ್ಲಿ ಮೊದಲ ಸುತ್ತಿನಲ್ಲೇ ಎಡವಿದ್ದರು. ಸೈನಾ ಅವರ ಮೊದಲ ಸುತ್ತಿನ ಎದುರಾಳಿ ಕೊರಿಯಾದ ಕಿಮ್‌ ಗಾ ಯುನ್‌.