ಕೊರಿಯ ಓಪನ್‌: ಸಿಂಧು, ಸಮೀರ್‌ ಕ್ವಾರ್ಟರ್‌ಫೈನಲಿಗೆ

Team Udayavani, Sep 15, 2017, 8:10 AM IST

ಸೋಲ್‌: ಭಾರತದ ಪಿವಿ ಸಿಂಧು ಮತ್ತು ಸಮೀರ್‌ ವರ್ಮ ಅವರು ನೇರ ಗೇಮ್‌ಗಳ ಗೆಲುವಿನೊಂದಿಗೆ ಕೊರಿಯ ಓಪನ್‌ ಸೂಪರ್‌ ಸೀರೀಸ್‌ ಬ್ಯಾಡ್ಮಿಂಟನ್‌ ಕೂಟದ ಕ್ವಾರ್ಟರ್‌ಫೈನಲ್‌ ತಲುಪಿದ್ದಾರೆ. ಆದರೆ ಪಾರುಪಳ್ಳಿ ಕಶ್ಯಪ್‌ ಮತ್ತು ಎಸ್‌. ಪ್ರಣೀತ್‌ ದ್ವಿತೀಯ ಸುತ್ತಿನ ಹೋರಾಟದಲ್ಲಿ ಸೋತು ಹೊರಬಿದ್ದಿದ್ದಾರೆ.

ಒಲಿಂಪಿಕ್‌ ಬೆಳ್ಳಿ ವಿಜೇತೆ ಸಿಂಧು ಥಾಲಂಡಿನ ನಿಚಾವೋನ್‌ ಜಿಂದಾಪಾಲ್‌ ಅವರನ್ನು 22-20, 21-17 ಗೇಮ್‌ಗಳಿಂದ ಉರುಳಿಸಿ ಕ್ವಾರ್ಟರ್‌ಫೈನಲಿಗೇರಿದರು. ಅವರಲ್ಲಿ ಜಪಾನಿನ ಮಿನಾಟ್ಸು ಮಿಟಾನಿ ಅವರ ಸವಾಲನ್ನು ಎದುರಿಸಲಿದ್ದಾರೆ. 2014ರ ವಿಶ್ವ ಚಾಂಪಿಯನ್‌ಶಿಪ್‌ನ ಕಂಚು ವಿಜೇತೆ ಮಿಟಾನಿ 2012ರ ಫ್ರೆಂಚ್‌ ಓಪನ್‌ ಕೂಟದಲ್ಲಿ ಸೈನಾ ನೆಹ್ವಾಲ್‌ ಅವರನ್ನು ಕೆಡಹಿ ಪ್ರಶಸ್ತಿ ಜಯಿಸಿದ್ದರು. 

ಹಾಂಕಾಂಗ್‌ ಸೂಪರ್‌ ಸೀರೀಸ್‌ ಫೈನಲಿಸ್ಟ್‌ ಮತ್ತು ಸಯ್ಯದ್‌ ಮೋದಿ ಗ್ರ್ಯಾನ್‌ ಪ್ರಿ ಗೋಲ್ಡ್‌ ವಿಜೇತ ಸಮೀರ್‌ ವರ್ಮ ಅವರು ಹಾಂಕಾಂಗ್‌ನ ವಾಂಗ್‌ ವಿಂಗ್‌ ಕಿ ವಿನ್ಸೆಂಟ್‌ ಅವರನ್ನು 41 ನಿಮಿಷಗಳ ಹೋರಾಟದಲ್ಲಿ 21-19, 21-13 ಗೇಮ್‌ಗಳಿಂದ ಸೋಲಿಸಿದರು. ಮುಂದಿನ ಸುತ್ತಿನಲ್ಲಿ ಅವರು ಸ್ಥಳೀಯ ಫೇವರಿಟ್‌ ಸನ್‌ ವಾನ್‌ ಹೊ ಅವರ ಸವಾಲಿಗೆ ಉತ್ತರಿಸಲಿದ್ದಾರೆ. ಸನ್‌ ವಾನ್‌ ದ್ವಿತೀಯ ಸುತ್ತಿನಲ್ಲಿ ಕಶ್ಯಪ್‌ ಅವರನ್ನು ಕೆಡಹಲು ಕಠಿನ ಪ್ರಯತ್ನ ನಡೆಸಿದರು. ಒಂದು ತಾಸು ಮತ್ತು 16 ನಿಮಿಷಗಳ ಸುದೀರ್ಘ‌ ಹೋರಾಟದಲ್ಲಿ ವಾನ್‌ ಅವರು 21-16, 17-21, 21-16 ಗೇಮ್‌ಗಳಿಂದ ಕಶ್ಯಪ್‌ಗೆ ಸೋಲುಣಿಸಿದರು. 

ಚಿರಾಗ್‌-ಸಾತ್ವಿಕ್‌ ಮುನ್ನಡೆ
ಭಾರತೀಯ ಯುವ ಡಬಲ್ಸ್‌ ತಾರೆಯರಾದ ಚಿರಾಗ್‌ ಶೆಟ್ಟಿ ಮತ್ತು ಸಾತ್ವಿಕ್‌ ಸಾಯ್‌ರಾಜ್‌ ಅವರು ಚೈನೀಸ್‌ ತೈಪೆಯ ಲೀ ಝೀ ಹುಯಿ ಮತ್ತು ಯಿ ಲಾಂಗ್‌ ಅವರನ್ನು 23-21, 16-21, 21-8 ಗೇಮ್‌ಗಳಿಂದ ಉರುಳಿಸಿ ಅಂತಿಮ ಎಂಟರ ಸುತ್ತಿಗೇರಿದರು. ಅವರಿಬ್ಬರು ಸೂಪರ್‌ ಸೀರೀಸ್‌ ಕೂಟದಲ್ಲಿ ಕ್ವಾರ್ಟರ್‌ಫೈನಲಿಗೇರಿರುವುದು ಇದೇ ಮೊದಲ ಸಲವಾಗಿದೆ. ಅರ್ಹತಾ ಸುತ್ತಿನಲ್ಲಿ ಮೊದಲ ಬಾರಿ ಆಡಿದ್ದ ಚಿರಾಗ್‌ ಮತ್ತು ಸಾತ್ವಿಕ್‌ ಅವರು ಮೊದಲ ಸುತ್ತಿನಲ್ಲಿ ಲೀ ಶೆಂಗ್‌ ಮು ಮತ್ತು ಲಿನ್‌ ಚಿಯಾ ಯು ಅವರನ್ನು 21-9, 22-24, 21-12 ಗೇಮ್‌ಗಳಿಂದ ಕೆಡಹಿದ್ದರು.