ಶ್ರೀಕಾಂತ್‌-ಲಕ್ಷ್ಯ ಸೆಮಿ ಸಮರ; ಎರಡು ಪದಕ ಖಾತ್ರಿ

Team Udayavani, Dec 18, 2021, 5:10 AM IST

ವೆಲ್ವಾ (ಸ್ಪೇನ್‌): ಬಿಡಬ್ಲ್ಯುಎಫ್ ವರ್ಲ್ಡ್ ಚಾಂಪಿಯನ್‌ಶಿಪ್‌ನಲ್ಲಿ ಕೆ. ಶ್ರೀಕಾಂತ್‌ ಮತ್ತು ಲಕ್ಷ್ಯ ಸೇನ್‌ ಸೆಮಿಫೈನಲ್‌ ಪ್ರವೇಶಿಸುವ ಮೂಲಕ ಭಾರತಕ್ಕೆ ಎರಡು ಪದಕಗಳನ್ನು ಖಾತ್ರಿ ಗೊಳಿಸಿದ್ದಾರೆ. ಆದರೆ ಹಾಲಿ ಚಾಂಪಿಯನ್‌ ಪಿ.ವಿ. ಸಿಂಧು ಸೆಮಿಫೈನಲ್‌ ಹಾದಿಯಲ್ಲಿ ಸೋತು ನಿರಾಸೆ ಮೂಡಿಸಿದ್ದಾರೆ.

ಶನಿವಾರ ನಡೆಯುವ ಪುರುಷರ ಸೆಮಿಫೈನಲ್‌ನಲ್ಲಿ ಕೆ. ಶ್ರೀಕಾಂತ್‌-ಲಕ್ಷ್ಯ ಸೇನ್‌ ನಡುವೆಯೇ ಸ್ಪರ್ಧೆ ಸಾಗಲಿದೆ. ಹೀಗಾಗಿ ಭಾರತಕ್ಕೆ ಒಂದು ಬೆಳ್ಳಿ ಹಾಗೂ ಒಂದು ಕಂಚಿನ ಪದಕ ಖಚಿತಗೊಂಡಿದೆ.

ಮಾಜಿ ನಂ.1 ಆಟಗಾರ ಕೆ. ಶ್ರೀಕಾಂತ್‌ ನೆದರ್ಲೆಂಡ್ಸ್‌ನ ಮಾರ್ಕ್‌ ಅವರನ್ನು ಬಹಳ ಸುಲಭದಲ್ಲಿ 21-8, 21-7 ಅಂತರದಿಂದ ಮಣಿಸಿದರು. ಇದು ಇವರಿಬ್ಬರ ನಡುವಿನ ಮೊದಲ ಮುಖಾಮುಖಿಯಾಗಿತ್ತು.

ಶ್ರೀಕಾಂತ್‌ ಗೆಲುವಿನ ಬೆನ್ನಲ್ಲೇ ಲಕ್ಷ್ಯ ಸೇನ್‌ ಕೂಡ ವಿಜಯದ ಓಟ ಮುಂದುವರಿಸಿದರು. ಚೀನದ ಜಾವೊ ಜುನ್‌ ಪೆಂಗ್‌ ವಿರುದ್ಧ 21-15, 15-21, 22-20 ಅಂತರದ ರೋಚಕ ಗೆಲುವು ದಾಖಲಿಸಿದರು.

ಇದನ್ನೂ ಓದಿ:ಬಾಂಗ್ಲಾದಲ್ಲಿ ಕಾಳಿ ಮಂದಿರ ಉದ್ಘಾಟಿಸಿದ ರಾಷ್ಟ್ರಪತಿ ಕೋವಿಂದ್‌

ಸಿಂಧು ಇನ್ನು ಮಾಜಿ ಹಾಲಿ ಚಾಂಪಿಯನ್‌ ಪಿ.ವಿ. ಸಿಂಧು ಅವರನ್ನು ವಿಶ್ವದ ನಂ.1 ಆಟಗಾರ್ತಿ, ಚೈನೀಸ್‌ ತೈಪೆಯ ತೈಜುಯಿಂಗ್‌ 21-17, 21-13 ನೇರ ಗೇಮ್‌ಗಳಿಂದ ಪರಾಭವಗೊಳಿಸಿದರು. ಅಗ್ರ ಶ್ರೇಯಾಂಕಿತೆ ತೈ ಜು ಯಿಂಗ್‌ ಅವರ ಬಲಿಷ್ಠ ಆಟದ ಮುಂದೆ ಸಿಂಧು ಆಟ ನಡೆಯಲಿಲ್ಲ. 42 ನಿಮಿಷಗಳಲ್ಲಿ ಈ ಪಂದ್ಯ ಅಂತ್ಯಗೊಂಡಿತು.