ವೇಗಿ ಮಾಲಿಂಗ ವಿರುದ್ಧವೂ ಲೈಂಗಿಕ ಕಿರುಕುಳ ಆರೋಪ

Team Udayavani, Oct 12, 2018, 11:45 AM IST

ಮುಂಬಯಿ: ಶ್ರೀಲಂಕಾ ಮಾಜಿ ಕ್ರಿಕೆಟಿಗ ಅರ್ಜುನ ರಣತುಂಗ ವಿರುದ್ಧ ಯುವತಿಯೊಬ್ಬಳು ಲೈಂಗಿಕ ಕಿರುಕುಳದ ಆರೋಪ ಮಾಡಿದ್ದರು. ಇದೀಗ ಅಲ್ಲಿನ ಖ್ಯಾತ ವೇಗಿ ಲಸಿತ ಮಾಲಿಂಗ ವಿರುದ್ಧವೂ ಮಿ ಟೂನಲ್ಲಿ ಆರೋಪವೊಂದು ಕೇಳಿ ಬಂದಿದೆ.

ಐಪಿಎಲ್‌ ವೇಳೆ ಭಾರತಕ್ಕೆ ಬಂದಿದ್ದ ಲಂಕಾ ಆಟಗಾರ ಹೊಟೇಲ್‌ ಒಂದರಲ್ಲಿ ಯುವತಿ ಜತೆ ಅಸಭ್ಯವಾಗಿ ವರ್ತಿಸಿದ್ದಾರೆ ಎನ್ನಲಾಗಿದ್ದು, ಇದನ್ನು ಗಾಯಕಿ ಚಿನ್ಮಯಿ ಶ್ರೀಪಾದ ಟ್ವಿಟರ್‌ನಲ್ಲಿ ಪ್ರಕಟಿಸಿ ಯುವತಿಗೆ ಆದ ನೋವನ್ನು ಹಂಚಿಕೊಂಡಿದ್ದಾರೆ.

ಕೆಲವು ವರ್ಷಗಳ ಹಿಂದಿನ ಘಟನೆಯಿದು. ಆಗ ಮಾಲಿಂಗ ಮುಂಬೈ ಇಂಡಿಯನ್ಸ್‌ ತಂಡವನ್ನು ಪ್ರತಿನಿಧಿಸುತ್ತಿದ್ದರು. ಯುವತಿ ಯೊಬ್ಬಳು ಮುಂಬಯಿ ಹೊಟೇಲ್‌ನಲ್ಲಿ ತಂಗಿದ್ದಳು. ಆಕೆ ತನ್ನ ಗೆಳತಿ ಬರುವುದನ್ನು ಕಾಯುತ್ತಿದ್ದಳು. ಈ ವೇಳೆ ಬಂದ ಮಾಲಿಂಗ ನಿನ್ನ ಗೆಳತಿ ನನ್ನ ಕೊಠಡಿಯಲ್ಲಿದ್ದಾರೆ ಎಂದು ತಿಳಿಸಿ ಕರೆದುಕೊಂಡು ಹೋಗಿದ್ದಾರೆ. ಬಳಿಕ ಅಸಭ್ಯವಾಗಿ ವರ್ತಿಸಿದ್ದಾರೆ. ಸೆಲೆಬ್ರಿಟಿ ಎಂದು ನಂಬಿ ಆಕೆ ಹೋಗಿದ್ದಳು. ಆದರೆ ಮಾಲಿಂಗ ಅಸಭ್ಯವಾಗಿ ನಡೆದುಕೊಂಡಿದ್ದಾರೆ. ಅಲ್ಲಿಂದ ಆಕೆ ತಪ್ಪಿಸಿಕೊಂಡು ಬಂದಿದ್ದಾಳೆ ಎಂದು ಚಿನ್ಮಯಿ ಘಟನೆಯನ್ನು ವಿವರಿಸಿದ್ದಾರೆ.