ಏಕೈಕ ಟಿ20: ಲಂಕಾ ತಂಡದಲ್ಲಿ ಲಸಿತ ಮಾಲಿಂಗ ಇಲ್ಲ

Team Udayavani, Aug 10, 2018, 6:15 AM IST

ಕೊಲಂಬೊ: ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧ ನಡೆಯಲಿರುವ ಏಕೈಕ ಟಿ20 ಪಂದ್ಯಕ್ಕಾಗಿ ಶ್ರೀಲಂಕಾ ತಂಡವನ್ನು ಪ್ರಕಟಿಸಲಾಗಿದ್ದು, ವೇಗಿ ಲಸಿತ ಮಾಲಿಂಗ ಅವರನ್ನು ಹೊರಗಿರಿಸಲಾಗಿದೆ. ಈ ಪಂದ್ಯ ಆ. 14ರಂದು ಕೊಲಂಬೊದ ಆರ್‌. ಪ್ರೇಮದಾಸ ಸ್ಟೇಡಿಯಂನಲ್ಲಿ ನಡೆಯಲಿದೆ.

ಟೊರಂಟೊದಲ್ಲಿ ನಡೆದ “ಗ್ಲೋಬಲ್‌ ಟಿ20 ಲೀಗ್‌’ನಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದ ಮಾಲಿಂಗ ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗುವ ನಿರೀಕ್ಷೆಯಲ್ಲಿದ್ದರು. ಮಾಲಿಂಗ ಬದಲು ಎಡಗೈ ಪೇಸ್‌ ಬೌಲರ್‌ ಬಿನುರ ಫೆರ್ನಾಂಡೊ ಅವರಿಗೆ ಅವಕಾಶ ಕಲ್ಪಿಸಲಾಗಿದೆ. 2015ರಲ್ಲೊಮ್ಮೆ ಪಾಕಿಸ್ಥಾನ ವಿರುದ್ಧದ ಟಿ20 ಸರಣಿಗೆ ಆಯ್ಕೆಯಾಗಿದ್ದ ಫೆರ್ನಾಂಡೊ ಅಲ್ಲಿ ಹನ್ನೊಂದರ ಬಳಗದಲ್ಲಿ ಕಾಣಿಸಿಕೊಂಡಿರಲಿಲ್ಲ. ಯುವ ಆಲ್‌ರೌಂಡರ್‌ ಧನಂಜಯ ಡಿ’ಸಿಲ್ವ ಅವರನ್ನು ಮರಳಿ ಕರೆಸಲಾಗಿದೆ. ಏಂಜೆಲೊ ಮ್ಯಾಥ್ಯೂಸ್‌ ಕೂಡ ಮರಳಿದ್ದು, ತಂಡವನ್ನು ಮುನ್ನಡೆಸಲಿದ್ದಾರೆ.

ಶ್ರೀಲಂಕಾ ತಂಡ: ಏಂಜೆಲೊ ಮ್ಯಾಥ್ಯೂಸ್‌ (ನಾಯಕ), ದಿನೇಶ್‌ ಚಂಡಿಮಾಲ್‌, ಅಖೀಲ ಧನಂಜಯ, ಧನಂಜಯ ಡಿ’ಸಿಲ್ವ, ಬಿನುರ ಫೆರ್ನಾಂಡೊ, ಶೇಹಾನ್‌ ಜಯಸೂರ್ಯ, ಲಹಿರು ಕುಮಾರ, ಶೇಹಾನ್‌ ಮಧುಶಂಕ, ಕುಸಲ್‌ ಮೆಂಡಿಸ್‌, ಕುಸಲ್‌ ಪೆರೆರ (ವಿ.ಕೀ.), ತಿಸರ ಪೆರೆರ, ಲಕ್ಷಣ ಸಂದಕನ್‌, ದಸುನ್‌ ಶಣಕ, ಉಪುಲ್‌ ತರಂಗ, ಜೆಫ್ರಿ ವಾಂಡರ್ಸೆ.