ಮಹಾರಾಷ್ಟ್ರ ಓಪನ್‌: ಗಿಲ್ಲೆಸ್‌ ಸೈಮನ್‌ ಚಾಂಪಿಯನ್‌

Team Udayavani, Jan 7, 2018, 6:10 AM IST

ಪುಣೆ: ಫ್ರಾನ್ಸ್‌ನ ಗಿಲ್ಲೆಸ್‌ ಸೈಮನ್‌ ಮಹಾರಾಷ್ಟ್ರ ಓಪನ್‌ ಟೆನಿಸ್‌ ಟೂರ್ನಿಯಲ್ಲಿ ನಡೆದ ಪುರುಷರ ಸಿಂಗಲ್ಸ್‌ ವಿಭಾಗದಲ್ಲಿ ಚಾಂಪಿಯನ್‌ ಆಗಿ ಹೊರಹೊಮ್ಮಿದ್ದಾರೆ. ಪಂದ್ಯದಲ್ಲಿ ವಿಶ್ವ ನಂ.89ನೇ ಶ್ರೇಯಾಂಕಿತ ಸೈಮನ್‌, ವಿಶ್ವ ನಂ.13ನೇ ಶ್ರೇಯಾಂಕಿತ ಕೆವಿಲ್‌ ಆ್ಯಂಡರ್ಸನ್‌ಗೆ ಆಘಾತ ನೀಡಿದ್ದಾರೆ.

ಶನಿವಾರ ನಡೆದ ಫೈನಲ್‌ನಲ್ಲಿ ಸೈಮನ್‌ 7-6 (7-4), 6-2 ರಿಂದ ದಕ್ಷಿಣ ಆಫ್ರಿಕಾದ ಕೆವಿನ್‌ ಆ್ಯಂಡರ್ಸನ್‌ ವಿರುದ್ಧ ನೇರ ಸೆಟ್‌ನಲ್ಲಿಯೇ ಜಯ ಸಾಧಿಸಿದರು. ಮೊದಲ ಸೆಟ್‌ನಲ್ಲಿ ಉಭಯ ಆಟಗಾರರ ನಡುವೆ ಭಾರೀ ಪೈಪೋಟಿ ಇತ್ತು. ಒಂದು ಹಂತದಲ್ಲಿ ಸೈಮನ್‌ ಮೇಲುಗೈ ಸಾಧಿಸಿದರೆ ಮತ್ತೂಂದು ಹಂತದಲ್ಲಿ ಆ್ಯಂಡರ್ಸನ್‌ ಮೇಲುಗೈ ಸಾಧಿಸುತ್ತಿದ್ದರು. ಪ್ರತಿಯೊಂದು ಹಂತದಲ್ಲಿಯೂ ಅಂಕಗಳಿಕೆಗೆ ಭಾರೀ ಹೋರಾಟವೇ ನಡೆಯುತ್ತಿತ್ತು. ದೀರ್ಘಾವಧಿಯಲ್ಲಿ ನಡೆದ ಈ ಸೆಟ್‌ನಲ್ಲಿ ಅಂತಿಮವಾಗಿ ಸೈಮನ್‌ ವಶಪಡಿಸಿಕೊಂಡು ಮೇಲುಗೈ ಸಾಧಿಸಿದರು.

ಆದರೆ 2ನೇ ಸೆಟ್‌ನಲ್ಲಿ ನಡೆದಿರುವುದೇ ಬೇರೆ, ಸೈಮನ್‌ಗೆ ದಕ್ಷಿಣ ಆಫ್ರಿಕಾದ ಆಟಗಾರ ಸವಾಲು ನೀಡುವಲ್ಲಿ ಎಡವಿದರು. ಆ್ಯಂಡರ್ಸನ್‌ ಕೆಲವು ಅನಗತ್ಯ ತಪ್ಪುಗಳನ್ನು ಮಾಡುವ ಮೂಲಕ ಎದುರಾಳಿಗೆ ಅಂಕಗಳನ್ನು ಬಿಟ್ಟುಕೊಟ್ಟರು. ಹೀಗಾಗಿ ಸೈಮನ್‌ ಸುಲಭ ಜಯ ದಾಖಲಿಸಿ ಚಾಂಪಿಯನ್‌ ಆದರು.