ಮುಂದಿನ ಕನಸು ಭಾರತ ರತ್ನ: ಕೋಮ್‌

Team Udayavani, Jan 27, 2020, 6:50 AM IST

ಹೊಸದಿಲ್ಲಿ: ಪದ್ಮವಿಭೂಷಣ ಗೌರವಕ್ಕೆ ಭಾಜನರಾದ ಮೊದಲ ಮಹಿಳಾ ಕ್ರೀಡಾಪಟು ಎಂಬುದು ಬಾಕ್ಸರ್‌ ಮೇರಿ ಕೋಮ್‌ ಅವರ ಹೆಗ್ಗಳಿಕೆ. ಈ ಸಂದರ್ಭದಲ್ಲಿ ಪ್ರತಿಕ್ರಿಯಿಸಿದ ಅವರು, ತನ್ನ ಮುಂದಿನ ಕನಸು ಭಾರತ ರತ್ನ ಪಡೆಯುವುದಾಗಿದೆ ಎಂದಿದ್ದಾರೆ. ಬಾಕ್ಸಿಂಗ್‌ ಕ್ಷೇತ್ರದಲ್ಲಿ ಮಾಡಿದ ಅತ್ಯುನ್ನತ ಸಾಧನೆಯನ್ನು ಪರಿಗಣಿಸಿ ಮೇರಿ ಕೋಮ್‌ಗೆ ಪದ್ಮವಿಭೂಷಣ ನೀಡಲಾಗಿದೆ.
“ಭಾರತ ರತ್ನಕ್ಕೆ ಭಾಜನವಾಗುವುದು ನನ್ನ ಕನಸಾಗಿದೆ. ಒಂದಲ್ಲ ಒಂದು ದಿನ ಈ ಪ್ರಶಸ್ತಿ ಪಡೆಯುತ್ತೇನೆ ಎಂಬ ನಂಬಿಕೆ ನನಗಿದೆ. ಇದೀಗ ದೇಶದ ಎರಡನೇ ಅತ್ಯುನ್ನತ ಪ್ರಶಸ್ತಿಯಾಗಿರುವ ಪದ್ಮವಿಭೂಷಣ ಲಭಿಸಿರುವುದು ಸಂತಸ ತಂದಿದೆ’ ಎಂದು 6 ಬಾರಿಯ ವಿಶ್ವ ಬಾಕ್ಸಿಂಗ್‌ ಚಾಂಪಿಯನ್‌ ಮೇರಿ ಕೋಮ್‌ ಹೇಳಿದ್ದಾರೆ.
ಕಠಿನ ಅಭ್ಯಾಸ
“ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಉತ್ತಮ ಪ್ರದರ್ಶನ ತೋರವುದೇ ನನ್ನ ಸದ್ಯದ ಗುರಿ. ಅದಕ್ಕಾಗಿ ಕಠಿನ ಅಭ್ಯಾಸದಲ್ಲಿ ತೊಡಗಿದ್ದೇನೆ’ ಎಂದು ಮೇರಿ ಕೋಮ್‌ ಹೇಳಿದರು.