ಮಯಾಮಿ ಓಪನ್‌ ಟೆನಿಸ್‌ ರೋಜರ್‌ ಫೆಡರರ್‌ಗೆ ಪ್ರಶಸ್ತಿ

Team Udayavani, Apr 4, 2017, 2:47 PM IST

ಕೀ ಬಿಸ್ಕೇನ್‌: ತನ್ನ ದೀರ್ಘ‌ ಕಾಲದ ಎದುರಾಳಿ ಸ್ಪೇನ್‌ನ ರಫೆಲ್‌ ನಡಾಲ್‌ ಅವರನ್ನು ನೇರ ಸೆಟ್‌ಗಳಿಂದ ಉರುಳಿಸಿದ ಸ್ವಿಟ್ಸರ್‌ಲ್ಯಾಂಡಿನ ರೋಜರ್‌ ಫೆಡರರ್‌ ಅವರು ಮಯಾಮಿ ಓಪನ್‌ ಟೆನಿಸ್‌ ಕೂಟದ ಪ್ರಶಸ್ತಿ ಗೆದ್ದುಕೊಂಡಿದ್ದಾರೆ. 

ಫೈನಲ್‌ನಲ್ಲಿ ಅಮೋಘ ಆಟವಾಡಿದ 18 ಬಾರಿಯ ಗ್ರ್ಯಾನ್‌ ಸ್ಲಾಮ್‌ ವಿಜೇತ ಫೆಡರರ್‌ 6-3, 6-4 ನೇರ ಸೆಟ್‌ಗಳಿಂದ ನಡಾಲ್‌ ಅವರನ್ನು ಸೋಲಿಸಿ ತನ್ನ ಮೂರನೇ ಮಯಾಮಿ ಓಪನ್‌ ಕೂಟದ ಪ್ರಶಸ್ತಿ ಜಯಿಸಿದರು. ಗಾಯದ ಸಮಸ್ಯೆಯಿಂದಾಗಿ ಆರು ತಿಂಗಳ ವಿಶ್ರಾಂತಿಯ ಬಳಿಕ ಟೆನಿಸ್‌ಗೆ ಮರಳಿದ ಫೆಡರರ್‌ ಅಮೋಘವಾಗಿ ಆಡುತ್ತಿದ್ದು ನಡಾಲ್‌ ವಿರುದ್ಧದ ಕಳೆದ ನಾಲ್ಕು ಮುಖಾಮುಖೀಯಲ್ಲಿ ಗೆಲುವಿನ ಜಯಭೇರಿ ದಾಖಲಿಸಿದ್ದಾರೆ. ಇದರಲ್ಲಿ ಆಸ್ಟ್ರೇಲಿಯನ್‌ ಓಪನ್‌ ಮತ್ತು ಇಂಡಿಯನ್‌ ವೇಲ್ಸ್‌ ಪ್ರಶಸ್ತಿ ಸೇರಿದೆ. ಕೆಲವು ವಾರಗಳ ಆಟ ಅಮೋಘವಾದದ್ದು ಎಂದು ಪಂದ್ಯದ ಬಳಿಕ ಫೆಡರರ್‌ ಪ್ರತಿಕ್ರಿಯೆ ನೀಡಿದ್ದಾರೆ.

ಗೆಲುವಿಗಾಗಿ ತೀವ್ರ ಪೈಪೋಟಿ ನೀಡಿದ್ದರೂ ಮಯಾಮಿಯಲ್ಲಿ ನಡಾಲ್‌ ಅವರಿಗೆ ಪ್ರಶಸ್ತಿ ಗೆಲುವು ದೂರವೇ ಉಳಿಯಿತು. ಇಲ್ಲಿ ಅವರು ಐದು ಬಾರಿ ಫೈನಲಿಗೇರಿದ್ದರೂ ಒಮ್ಮೆಯೂ ಪ್ರಶಸ್ತಿ ಒಲಿಸಿಕೊಂಡಿಲ್ಲ. ಈ ವರ್ಷ ಮೂರು ಕೂಟಗಳಲ್ಲಿ ಫೈನಲಿಗೇರಿದ್ದರೂ ನಡಾಲ್‌ ಸೋಲನ್ನು ಕಂಡು ನಿರಾಸೆ ಅನುಭವಿಸಿದ್ದಾರೆ. ಅವರು ಅಕಾಪುಲ್ಕೊದಲ್ಲಿ ನಡೆದ ಕೂಟದಲ್ಲಿ ಸ್ಯಾಮ್‌ ಕ್ವೆರಿ ಮತ್ತು ಆಸ್ಟ್ರೇಲಿಯದಲ್ಲಿ ಫೆಡರರ್‌ಗೆ ಶರಣಾಗಿದ್ದರು. ಆದರೆ ಮುಂಬರುವ ಆವೇ ಅಂಗಣದ ಹೋರಾಟಕ್ಕೆ ಅವರ ಈ ಉತ್ತಮ ಫಾರ್ಮ್ ಬಹಳಷ್ಟು ನೆರವು ನೀಡುವ ಸಾಧ್ಯತೆಯಿದೆ.