ರೊಜರ್  ಕಪ್‌: ರೊನಿಕ್‌ ಮುನ್ನಡೆ

Team Udayavani, Aug 8, 2018, 6:00 AM IST

ಟೊರೊಂಟೊ: ರೋಜರ್ ಕಪ್‌ನಲ್ಲಿ ಕೆನಡ ಸವಾಲಿನ ನೇತೃತ್ವವನ್ನು ಮಿಲೋಸ್‌ ರೊನಿಕ್‌ ವಹಿಸಿದ್ದಾರೆ. 2016ರ ವಿಂಬಲ್ಡನ್‌ ಫೈನಲಿಸ್ಟ್‌ ರೊನಿಕ್‌ ಅವರು ಡೇವಿಡ್‌ ಗೊಫಿನ್‌ ಅವರನ್ನು 6-3, 6-4 ಸೆಟ್‌ಗಳಿಂದ ಸೋಲಿಸಿ ದ್ವಿತೀಯ ಸುತ್ತು ತಲುಪಿದರು. ವಿಶ್ವದ 11ನೇ ರ್‍ಯಾಂಕಿನ ಗೊಫಿನ್‌ ಗೆಲುವಿಗಾಗಿ ಪ್ರಬಲ ಹೋರಾಟ ನಡೆಸಿದರೂ ರೊನಿಕ್‌ ಇದಕ್ಕೆ ಅವಕಾಶ ನೀಡಲಿಲ್ಲ.

ಅಚ್ಚರಿಯ ಫ‌ಲಿತಾಂಶ
ಇನ್ನೊಂದು ಪಂದ್ಯದಲ್ಲಿ ವಿಶ್ವದ ಮೂರನೇ ರ್‍ಯಾಂಕಿನ ಡೇವಿಡ್‌ ಫೆರರ್‌ ಕಠಿನ ಹೋರಾಟದಲ್ಲಿ ವಿಶ್ವದ 116ನೇ ರ್‍ಯಾಂಕಿನ ಬ್ರ್ಯಾಡ್ಲೆ ಕ್ಲಾನ್‌ ಅವರಿಗೆ ಶರಣಾಗಿ ಅಚ್ಚರಿಯ ಫ‌ಲಿತಾಂಶಕ್ಕೆ ಕಾರಣರಾಗಿದ್ದಾರೆ. 27ರ ಹರೆಯದ ಅಮೆರಿಕದ ಕ್ಲಾನ್‌ 7-6 (7-5), 6-4 ಸೆಟ್‌ಗಳಿಂದ ಗೆಲುವು ಸಾಧಿಸಿ ಮುನ್ನಡೆದಿದ್ದಾರೆ. 2014ರ ಆಗಸ್ಟ್‌ ಬಳಿಕ ಇದು ಎಟಿಪಿ ಟೂರ್‌ ಮಟ್ಟದಲ್ಲಿ ಕ್ಲಾನ್‌ ದಾಖಲಿಸಿದ ಎರಡನೇ ಗೆಲುವು ಆಗಿದೆ. ದ್ವಿತೀಯ ಸುತ್ತಿನಲ್ಲಿ ಅವರು ಹಾಲಿ ಚಾಂಪಿಯನ್‌ ಅಲೆಕ್ಸಾಂಡರ್‌ ಜ್ವೆರೇವ್‌ ಅವರನ್ನು ಎದುರಿಸಲಿದ್ದಾರೆ.