ಪ್ರಶಸ್ತಿಗಾಗಿ ನಡಾಲ್‌-ನಿಶಿಕೋರಿ ಹೋರಾಟ

Team Udayavani, Apr 23, 2018, 6:05 AM IST

ಮಾಂಟೆ ಕಾರ್ಲೊ: ಒಂದು ಸೆಟ್‌ ಹಿನ್ನೆಡೆಯಲ್ಲಿದ್ದರೂ ಅಮೋಘ ಆಟವಾಡಿದ ಕೆಯಿ ನಿಶಿಕೋರಿ ಅವರು ಅಲೆಕ್ಸಾಂಡರ್‌ ಜ್ವೆರೇವ್‌ ಅವರನ್ನು ಸೋಲಿಸಿ ಮಾಂಟೆ ಕಾರ್ಲೊ ಮಾಸ್ಟರ್ ಟೆನಿಸ್‌ ಕೂಟದ ಫೈನಲ್‌ ಹಂತಕ್ಕೇರಿದರು. ಪ್ರಶಸ್ತಿಗಾಗಿ ನಡೆಯುವ ಹೋರಾಟದಲ್ಲಿ ನಿಶಿಕೋರಿ ರಫೆಲ್‌ ನಡಾಲ್‌ ಅವರನ್ನು ಎದುರಿಸಲಿದ್ದಾರೆ.

ತನ್ನ 21ನೇ ಹುಟ್ಟುಹಬ್ಬದ ದಿನ ರಿಚರ್ಡ್‌ ಗ್ಯಾಸ್ಕ್ವೆಟ್‌ ಅವರನ್ನು ಕಠಿನ ಹೋರಾಟದಲ್ಲಿ ಸೋಲಿಸಿ ಸೆಮಿಫೈನಲ್‌ ತಲುಪಿದ್ದ ಜ್ವೆರೇವ್‌ ಅವರು ನಿಶಿಕೋರಿ ವಿರುದ್ಧದ ಪಂದ್ಯದಲ್ಲಿ ಮೊದಲ ಸೆಟ್‌ ಗೆದ್ದರೂ ಆಬಳಿಕ ಪಂದ್ಯದಲ್ಲಿ ಹಿಡಿತ ಸಾಧಿಸಲು ವಿಫ‌ಲರಾದರು. ಸತತ ಎರಡು ಪಂದ್ಯಗಳಿಂದ ಸುಸ್ತಾದ ಅವರು ಅಂತಿಮವಾಗಿ 6-3, 3-6, 4-6 ಸೆಟ್‌ಗಳಿಂದ ಸೋತು ಹೊರಬಿದ್ದರು.

ಈ ಹಿಂದೆ ಮೂರು ಬಾರಿ ಮಾಸ್ಟರ್ ಕೂಟದ ಫೈನಲ್‌ ಸುತ್ತಿಗೇರಿದ್ದ ನಿಶಿಕೋರಿ ಒಮ್ಮೆಯೂ ಪ್ರಶಸ್ತಿ ಜಯಿಸಿಲ್ಲ. ನಾಲ್ಕು ವರ್ಷಗಳ ಹಿಂದೆ ಮ್ಯಾಡ್ರಿಡ್‌ನ‌ಲ್ಲಿ ನಡಾಲ್‌ ಅವರಿಗೆ ಶರಣಾಗಿ ಪ್ರಶಸ್ತಿಯಿಂದ ವಂಚಿತರಾಗಿದ್ದರು. ಈ ಬಾರಿಯಾದರೂ ಗೆಲ್ಲುವ ವಿಶ್ವಾಸವನ್ನು ನಿಶಿಕೋರಿ ಇಟ್ಟುಕೊಂಡಿದ್ದಾರೆ. 2016ರಲ್ಲಿ ಒಲಿಂಪಿಕ್‌ ಕಂಚಿಗಾಗಿ ನಡೆದ ಪಂದ್ಯದಲ್ಲಿ ನಿಶಿಕೋರಿ ಅವರು ನಡಾಲ್‌ ಅವರನ್ನು ಸೋಲಿಸಿದ್ದರು. ಆದರೆ ಆವೇ ಅಂಗಣದಲ್ಲಿ 10 ಬಾರಿಯ ಮಾಂಟೆ ಕಾರ್ಲೊ ಚಾಂಪಿಯನ್‌ ನಡಾಲ್‌ ಅವರನ್ನು ನಿಶಿಕೋರಿ ಸೋಲಿಸಿಲ್ಲ.

ಶನಿವಾರ ನಡೆದ ಸೆಮಿಫೈನಲ್‌ ಪಂದ್ಯದಲ್ಲಿ ಗ್ರಿಗರ್‌ ದಿಮಿತ್ರೋವ್‌ ಅವರನ್ನು 6-4, 6-1 ಸೆಟ್‌ಗಳಿಂದ ಸೋಲಿಸುವ ಮೂಲಕ ನಡಾಲ್‌ ಫೈನಲಿಗೇರಿದ್ದರು. ಮಾಂಟೆ ಕಾರ್ಲೊದಲ್ಲಿ ಅವರು 12ನೇ ಬಾರಿ ಫೈನಲಿಗೇರಿದ್ದಾರೆ.