ಬೈಕ್‌ ಸೈಕ್ಲಿಂಗ್‌: ರಾಜ್ಯಕ್ಕೆ ಎರಡು ಚಿನ್ನ

Team Udayavani, Feb 21, 2020, 4:34 PM IST

Representative Image

ಬೆಳಗಾವಿ: ಭಾರತೀಯ ಸೈಕ್ಲಿಂಗ್‌ ಒಕ್ಕೂಟ ಹಾಗೂ ಉತ್ತರಾಖಂಡ ಸೈಕ್ಲಿಂಗ್‌ ಸಂಸ್ಥೆ ಜಂಟಿ ಆಶ್ರಯದಲ್ಲಿ ಉತ್ತರಾಖಂಡದ ಹಲ್‌ ವಾಣಿಯಲ್ಲಿ ಆರಂಭವಾದ 16ನೇ ರಾಷ್ಟ್ರೀಯ ಮೌಂಟೇನ್‌ ಬೈಕ್‌ ಸೈಕ್ಲಿಂಗ್‌ ಚಾಂಪಿಯನ್‌ ಶಿಪ್‌ನಲ್ಲಿ ಕರ್ನಾಟಕದ ಸ್ಪರ್ಧಿಗಳು 2 ಚಿನ್ನ, 1 ಬೆಳ್ಳಿ ಮತ್ತು 1 ಕಂಚಿನ ಪದಕ ಗಳಿಸಿದ್ದಾರೆ.

ವಿಜಯಪುರದ ರಾಘವೇಂದ್ರ ವಂದಾಲ ಹಾಗೂ ಮೈಸೂರಿನ ಚರಿತಗೌಡ ಮೊದಲ ದಿನವೇ ಚಿನ್ನದ ಪದಕ ಬಾಚಿಕೊಂಡು ಗಮನಸೆಳೆದರು.

14 ವರ್ಷದೊಳಗಿನ ಬಾಲಕರ ವಿಭಾಗದ 2 ಲ್ಯಾಪ್‌ ವೈಯಕ್ತಿಕ ಟೈಮ್‌ ಟ್ರಯಲ್‌ನಲ್ಲಿ ವಿಜಯಪುರದ ಸೈಕ್ಲಿಂಗ್‌ ಕ್ರೀಡಾನಿಲಯದ ರಾಘವೇಂದ್ರ ವಂದಾಲ 22.54.673 ಸಮಯದಲ್ಲಿ ಗುರಿ ತಲುಪಿ ಚಿನ್ನದ ಪದಕ ಪಡೆದರು.

ಬಾಲಕಿಯರ ವಿಭಾಗದಲ್ಲಿ ಮೈಸೂರಿನ ಕರೆನ ಮಾರ್ಶಲ್‌ 2 ಲ್ಯಾಪ್‌ ವೈಯಕ್ತಿಕ ಟೈಮ್‌ ಟ್ರಯಲ್‌ನಲ್ಲಿ 31.08.824 ಸಮಯದಲ್ಲಿ ಗುರಿ ತಲುಪಿ ಬೆಳ್ಳಿ ಪದಕಕ್ಕೆ ಭಾಜನರಾದರು. 16 ವರ್ಷದೊಳಗಿನ ಬಾಲಕರ ವಿಭಾಗದಲ್ಲಿ ಮೈಸೂರಿನ ಚರಿತಗೌಡ 3 ಲ್ಯಾಪ್‌ ವೈಯಕ್ತಿಕ ಟೈಮ್‌ ಟ್ರಯಲ್‌ನಲ್ಲಿ 35.55.598 ಸಮಯದಲ್ಲಿ ಗುರಿ ತಲುಪಿ ಚಿನ್ನ ಗೆದ್ದರು. ಮಹಿಳೆಯರ ವಿಭಾಗದಲ್ಲಿ ಬೆಂಗಳೂರಿನ ಜೋಸ್ನಾ ಕಂಚಿನ ಪದಕ ಪಡೆದರು.