ಮಗಳ ಶಾಲಾ ಕಾರ್ಯಕ್ರಮದಲ್ಲಿ ಧೋನಿ

Team Udayavani, Jan 13, 2018, 11:33 AM IST

ನವದೆಹಲಿ: ಸಕ್ರಿಯ ಕ್ರಿಕೆಟಿಗರಿಗೆ ತಮ್ಮ ಕುಟುಂಬಕ್ಕೆ ಸಮಯ ಕೊಡಲಾಗುವುದಿಲ್ಲ ಎನ್ನುವುದು ಒಪ್ಪಿಕೊಳ್ಳಲೇಬೇಕಾದ ಸತ್ಯ. ಈ ಬಗ್ಗೆ ಸಚಿನ್‌ ತೆಂಡುಲ್ಕರ್‌ ತಮ್ಮ ನಿವೃತ್ತಿಯ ವೇಳೆ ಮಾತನಾಡಿ ಬೇಸರ ವ್ಯಕ್ತಪಡಿಸಿದ್ದರು. ಆದರೆ ಧೋನಿ ಪರಿಸ್ಥಿತಿ ಹಾಗಿಲ್ಲ. ಟೆಸ್ಟ್‌ ಕ್ರಿಕೆಟ್‌ಗೆ ನಿವೃತ್ತಿ ಹೇಳಿರುವ ಅವರು ಏಕದಿನ, ಟಿ20ಯಲ್ಲಿ ಮಾತ್ರ ಸಕ್ರಿಯ.

ಆದ್ದರಿಂದ ಅವರಿಗೆ ಒಂದಷ್ಟು ಸಮಯ ದೊರೆಯುತ್ತಿದೆ. ಮಗಳು ಜೀವಾ ಸೇರಿಕೊಂಡಿರುವ ಶಾಲೆಗೆ ಅವರು ಭೇಟಿ ನೀಡಿ ಕಾರ್ಯಕ್ರಮದಲ್ಲಿ ಭಾಗವಹಿಸಿರುವುದೇ ಇದಕ್ಕೆ ಸಾಕ್ಷಿ. ಮಗಳ ಜೊತೆ ಮಾತ್ರವಲ್ಲ ಇತರೆ ಮಕ್ಕಳ ಜೊತೆಯೂ ಬೆರೆತಿರುವ ಚಿತ್ರವನ್ನು ಅವರು ಟ್ವೀಟರ್‌ನಲ್ಲಿ ಅಪ್‌ಲೋಡ್‌ ಮಾಡಿದ್ದಾರೆ. ಇದಕ್ಕೆ ಅಭಿಮಾನಿಗಳು ಭಾರೀ ಪ್ರತಿಕ್ರಿಯೆ ನೀಡಿದ್ದಾರೆ. ಧೋನಿ ಟೆಸ್ಟ್‌ಗೆ ನಿವೃತ್ತಿ ಘೋಷಿಸಿರುವುದರಿಂದ ದಕ್ಷಿಣ ಆಫ್ರಿಕಾಗೆ ಭಾರತ ತಂಡದ ಜತೆ ಪ್ರವಾಸ ಬೆಳೆಸಿಲ್ಲ. ಫೆ.1ರಿಂದ ದಕ್ಷಿಣ ಆಫ್ರಿಕಾ ವಿರುದ್ಧ ಆರಂಭವಾಗಲಿರುವ ಸೀಮಿತ ಓವರ್‌ ಪಂದ್ಯಕ್ಕೆ ತಂಡವನ್ನು ಕೂಡಿಕೊಳ್ಳಲಿದ್ದಾರೆ.