ಆ. 23ರಿಂದ ನಾಡಾ ಟೆಸ್ಟ್‌?

Team Udayavani, Aug 19, 2019, 5:18 AM IST

ಹೊಸದಿಲ್ಲಿ: ಬಿಸಿಸಿಐ ವ್ಯಾಪ್ತಿಯಲ್ಲಿ ಬರುವ ಕ್ರಿಕೆಟಿಗರನ್ನು ನಾಡಾ (ಭಾರತೀಯ ಉದ್ದೀಪನ ನಿಗ್ರಹ ಸಂಸ್ಥೆ) ಶೀಘ್ರದಲ್ಲೇ ಪರೀಕ್ಷೆಗೊಳಪಡಿಸಲಿದೆ. ಈಗ ಬೆಂಗಳೂರಿನಲ್ಲಿ ಆರಂಭವಾಗಿರುವ “ದುಲೀಪ್‌ ಟ್ರೋಫಿ’ ಕ್ರಿಕೆಟ್‌ ಪಂದ್ಯಾವಳಿಯ ವೇಳೆ ಈ ಪರೀಕ್ಷೆ ನಡೆಯಲಿದೆ ಎಂದು ವರದಿಯಾಗಿದೆ.

ಆದರೆ ನಾಡಾ ಪರೀಕ್ಷೆ ಈಗಾಗಲೇ ಆರಂಭ ವಾಗಿರುವ ಇಂಡಿಯಾ ಬ್ಲೂ-ಇಂಡಿಯಾ ಗ್ರೀನ್‌ ನಡುವಿನ ಪಂದ್ಯದ ವೇಳೆ ನಡೆಯುವುದು ಅನುಮಾನ. ಬದಲಿಗೆ ಇದನ್ನು ಆ. 23ರಿಂದ ಬೆಂಗಳೂರಿನ ಆಲೂರಿನಲ್ಲಿ ನಡೆಯಲಿರುವ ಪಂದ್ಯದಿಂದ ಆರಂಭಿಸುವ ಸಾಧ್ಯತೆಯಿದೆ.

ಇತ್ತೀಚೆಗೆ ಬಿಸಿಸಿಐ ಮತ್ತು ನಾಡಾ ಅಧಿಕಾರಿಗಳ ನಡುವೆ ಮಹತ್ವದ ಮಾತುಕತೆ ನಡೆದು, ನಾಡಾದಿಂದ ಉದ್ದೀಪನ ಪರೀಕ್ಷೆಗೆ ಒಪ್ಪಿಗೆ ಸೂಚಿಸಲಾಗಿತ್ತು. ಆದರೆ ಗುಣಮಟ್ಟದ ವೈದ್ಯಾಧಿಕಾರಿಗಳು, ಉದ್ದೀಪನ ಸಂಗ್ರಹಿಸುವ ತಜ್ಞರು ಇರಬೇಕೆಂದು ಬಿಸಿಸಿಐ ಆಗ್ರಹಿಸಿತ್ತು. ಇದಕ್ಕೆ ನಾಡಾ ಒಪ್ಪಿಗೆ ಸೂಚಿಸಿದೆ.