China Open 2024 : ಒಸಾಕಾ ದ್ವಿತೀಯ ಸುತ್ತಿಗೆ

Team Udayavani, Sep 26, 2024, 7:50 AM IST

ಬೀಜಿಂಗ್‌: ಜಪಾನ್‌ನ ನವೋಮಿ ಒಸಾಕಾ “ಚೀನ ಓಪನ್‌’ ಟೆನಿಸ್‌ ಪಂದ್ಯಾವಳಿಯ ದ್ವಿತೀಯ ಸುತ್ತು ಪ್ರವೇಶಿಸಿದ್ದಾರೆ. ಬುಧವಾರದ ಆರಂಭಿಕ ಸುತ್ತಿನ ಪಂದ್ಯದಲ್ಲಿ ಅವರು ಇಟಲಿಯ ಲೂಸಿಯಾ ಬ್ರಾಮ್ ಝೆಟ್ಟಿ ವಿರುದ್ಧ 6-3, 6-2 ಅಂತರದ ಜಯ ಸಾಧಿಸಿದರು.

ಕೋವಿಡ್‌-19ಗಿಂತ ಮೊದಲು, 2019ರಲ್ಲಿ ಚೀನ ಓಪನ್‌ ಚಾಂಪಿಯನ್‌ ಆಗಿದ್ದ ನವೋಮಿ ಒಸಾಕಾ ಅವರಿನ್ನು ಯುಲಿಯಾ ಪುಟಿನ್ಸೇವಾ ವಿರುದ್ಧ ಆಡಲಿದ್ದಾರೆ.
ಇನ್ನೊಂದು ಪಂದ್ಯದಲ್ಲಿ ಮಾಜಿ ಆಸ್ಟ್ರೇಲಿಯನ್‌ ಓಪನ್‌ ಚಾಂಪಿಯನ್‌, ಅಮೆರಿಕದ ಸೋಫಿಯಾ ಕೆನಿನ್‌ ರೊಮೇನಿಯಾದ ಅನಾ ಬೋಗ್ದಾನಾ ಅವರೆದುರು 7-5, 6-2 ಅಂತರದಿಂದ ಗೆದ್ದು ಬಂದರು. ಈ ಪಂದ್ಯಾವಳಿಯಲ್ಲಿ ಅಮೆರಿಕದ 15 ಮಂದಿ ಆಟಗಾರ್ತಿಯರು ಆಡುತ್ತಿರುವುದು ವಿಶೇಷ. ಕೆನಿನ್‌ ಅವರ 2ನೇ ಸುತ್ತಿನ ಎದುರಾಳಿ ಡಯಾನಾ ಶ್ನೆ„ಡರ್‌.

ಅಮೆರಿಕದ ಮತ್ತೋರ್ವ ಆಟಗಾರ್ತಿ ಟೇಲರ್‌ ಟೌನ್ಸೆಂಡ್‌ 6-2, 4-6, 6-3ರಿಂದ ಮಾರ್ಟಿನಾ ಟ್ರೆವಿಸಾನ್‌ ಅವರನ್ನು, ಚೀನದ ವಾಂಗ್‌ ಕ್ಸಿನ್ಯು ಜಪಾನ್‌ನ ಮೈ ಹೊಂಟಾಮಾ ಅವರನ್ನು 6-1, 4-6, 6-3ರಿಂದ ಮಣಿಸಿದರು.

ಬರೆಟ್ಟಿ ಗೆಲುವು
ಟೋಕಿಯೊ: ಜಪಾನ್‌ ಓಪನ್‌ ಟೆನಿಸ್‌ನಲ್ಲಿ ಮ್ಯಾಟಿಯೊ ಬರೆಟ್ಟಿ ಗೆಲುವಿನ ಆರಂಭ ಪಡೆದಿದ್ದಾರೆ. ಅವರು ಬೋಟಿಕ್‌ ವಾನ್‌ ಡೆ ಝಂಡ್‌ಶಪ್‌ ವಿರುದ್ಧ 6-3, 6-4ರಿಂದ ಗೆದ್ದು ಬಂದರು. ಇವರು ಮುಂದಿನ ಸುತ್ತಿನಲ್ಲಿ ಅಗ್ರ ಶ್ರೇಯಾಂಕದ ಟೇಲರ್‌ ಫ್ರಿಟ್ಜ್ ಅವರನ್ನು ಎದುರಿಸುವ ಸಾಧ್ಯತೆ ಇದೆ.