ಕೈ ಬೆರಳಿನ ಸಮಸ್ಯೆ ಕಾಡದು: ಲಿಯೋನ್‌

Team Udayavani, Mar 14, 2017, 2:50 AM IST

ರಾಂಚಿ: ಆಸ್ಟ್ರೇಲಿಯ ತಂಡದ ಗಾಯಾಳುಗಳ ಸಮಸ್ಯೆ ಬಿಗಡಾಯಿಸುತ್ತಲೇ ಇದೆ. ಮಿಚೆಲ್‌ ಸ್ಟಾರ್ಕ್‌, ಮಿಚೆಲ್‌ ಮಾರ್ಷ್‌ ಬಳಿಕ ಈಗ ಸ್ಪಿನ್ನರ್‌ ನಥನ್‌ ಲಿಯೋನ್‌ ಸರದಿ. ಬೆಂಗಳೂರು ಟೆಸ್ಟ್‌ ಪಂದ್ಯದ ವೇಳೆ ತಾನು ಬಲಗೈ ತೋರು ಬೆರಳಿನಿಂದ ನೋವಿಗೆ ತುತ್ತಾಗಿದ್ದೆ, ಇದರಿಂದ ಬೌಲಿಂಗ್‌ ನಡೆಸಲು ಕಷ್ಟವಾಗಿತ್ತು ಎಂದಿದ್ದಾರೆ. ಆದರೆ ರಾಂಚಿ ಟೆಸ್ಟ್‌ ಪಂದ್ಯ ಆಡುವುದರಲ್ಲಿ ಅನುಮಾನವೇ ಇಲ್ಲ ಎಂಬ ಭರವಸೆಯ ಮಾತಾಡಿದ್ದಾರೆ.

ಇಂಥ ನೋವು ಸಹಜ
‘ಪ್ರಸಕ್ತ ಋತುವಿನಲ್ಲಿ ನಾನು ಬಹಳಷ್ಟು ಬೌಲಿಂಗ್‌ ನಡೆಸಿದ್ದೇನೆ. ವರ್ಷಕ್ಕೆ ಒಂದೆರಡು ಸಲ ಇಂಥ ನೋವು ಕಾಡುವುದು ಸಹಜ. ಈಗಲೂ ನೋವಿದೆ. ಟೇಪ್‌ ಸುತ್ತಿ ಬೌಲಿಂಗ್‌ ನಡೆಸುವುದಾದರೆ ಸಮಸ್ಯೆ ಕಾಡದು. ಆದರೆ ಇದಕ್ಕೆ ಕ್ರಿಕೆಟಿನ ನೀತಿ ನಿಯಮಾವಳಿ ಅಡ್ಡ ಬರುತ್ತದೆ. ಕಳೆದ ಸಲ ಭಾರತಕ್ಕೆ ಬಂದಾಗಲೂ ಇದೇ ಸಮಸ್ಯೆ ಎದುರಾಗಿತ್ತು. ಆದರೆ ಅಂದಿಗಿಂತ ಈ ಸಲ ಎಷ್ಟೋ ವಾಸಿ. ರಾಂಚಿ ಟೆಸ್ಟ್‌ ಆಡುವುದನ್ನು ನಾನೀಗ ಎದುರು ನೋಡುತ್ತಿದ್ದೇನೆ…’ ಎಂದು ಲಿಯೋನ್‌ ಹೇಳಿದ್ದಾರೆ.