ರಾಷ್ಟ್ರೀಯ ಕಿರಿಯರ ಈಜು: ಕರ್ನಾಟಕಕ್ಕೆ ಸಮಗ್ರ ಪ್ರಶಸ್ತಿ

Team Udayavani, Jul 7, 2017, 3:45 AM IST

ಬೆಂಗಳೂರು: ಪುಣೆಯಲ್ಲಿ ಮುಕ್ತಾಯಗೊಂಡ 44ನೇ ಕಿರಿಯರ ರಾಷ್ಟ್ರೀಯ ಈಜು ಕೂಟದಲ್ಲಿ ಕರ್ನಾಟಕ ಸಮಗ್ರ ಪ್ರಶಸ್ತಿಯನ್ನು ಗೆದ್ದುಕೊಂಡಿದೆ. ರಾಜ್ಯ ತಂಡ ಒಟ್ಟಾರೆ 588 ಅಂಕಗಳನ್ನು ಪಡೆಯಿತು. ತಂಡ ವಿಭಾಗದ ಚಾಂಪಿಯನ್‌ಶಿಪ್‌ನ ಬಾಲಕರ ವಿಭಾಗದ ಎರಡು ಪ್ರಶಸ್ತಿಗಳು ರಾಜ್ಯ ತಂಡದ ಪಾಲಾಯಿತು. ಬಾಲಕಿಯರ ವಿಭಾಗದಲ್ಲಿ ಗುಂಪು 1ರ ಚಾಂಪಿಯನ್‌ಶಿಪ್‌ ಮಹಾರಾಷ್ಟ್ರ ಪಾಲಾದರೆ ಕರ್ನಾಟಕ  ಬಾಲಕಿಯರ ಗುಂಪು 2ರ ಚಾಂಪಿಯನ್‌ಶಿಪ್‌ ಗೆದ್ದುಕೊಂಡಿತು. ವಾಟರ್‌ಪೋಲೋ ವಿಭಾಗದಲ್ಲಿ ರಾಜ್ಯ ಬಾಲಕರ ತಂಡ ಪ್ರಶಸ್ತಿ ಗೆಲ್ಲಲು ವಿಫ‌ಲರಾದರು. ಕರ್ನಾಟಕ ಬಾಲಕಿಯರ ತಂಡ ದ್ವಿತೀಯ ಸ್ಥಾನ  ಪಡೆದುಕೊಂಡಿತು.

ರಾಜ್ಯಕ್ಕೆ ಒಟ್ಟಾರೆ 71 ಪದಕ: ಕರ್ನಾಟಕ ತಂಡ ಈಜು ಕೂಟದಲ್ಲಿ ಒಟ್ಟಾರೆ 71 ಪದಕ ಬಾಚಿಕೊಂಡಿತು. 23 ಚಿನ್ನ, 28 ಬೆಳ್ಳಿ ಹಾಗೂ 20 ಕಂಚಿನ ಪದಕ ಒಳಗೊಂಡಿದೆ. ಬಾಲಕರ ವಿಭಾಗದಲ್ಲಿ ರಾಜ್ಯ 13 ಚಿನ್ನ, 8 ಬೆಳ್ಳಿ ಹಾಗೂ 10 ಕಂಚು ಮತ್ತು ಬಾಲಕಿಯರ ವಿಭಾಗದಲ್ಲಿ 10 ಚಿನ್ನ, 20 ಬೆಳ್ಳಿ ಹಾಗೂ 10 ಕಂಚಿನ ಪದಕ ಗೆದ್ದುಕೊಂಡಿದೆ. ಪದಕ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದುಕೊಂಡಿದೆ. 26 ಚಿನ್ನ, 19 ಬೆಳ್ಳಿ ಹಾಗೂ 12 ಕಂಚು ಸೇರಿದಂತೆ ಒಟ್ಟು 57 ಪದಕ ಗೆದ್ದ ಮಹಾರಾಷ್ಟ್ರ  ರನ್ನರ್‌ಅಪ್‌ ಆಯಿತು. ಒಟ್ಟಾರೆ 27  ಪದಕ ಗೆದ್ದ ತಮಿಳುನಾಡು ತೃತೀಯ  ಸ್ಥಾನ ಪಡೆಯಿತು.