ನ್ಯಾಶನಲ್‌ ಲೀಗ್‌ ಪೋರ್ಚುಗಲ್‌ಗೆ ಸೋಲು

Team Udayavani, Nov 15, 2020, 9:50 PM IST

ಚೆಂಡಿಗಾಗಿ ಪೋರ್ಚುಗಲ್‌ ಮತ್ತು ಫ್ರಾನ್ಸ್‌ ಆಟಗಾರರ ಪೈಪೋಟಿ.

ಲಿಸ್ಟನ್‌ (ಪೋರ್ಚುಗಲ್‌): ಕ್ರಿಸ್ಟಿಯಾನೊ ರೊನಾಲ್ಡೊ ಅವರ ಪೋರ್ಚುಗಲ್‌ ಮತ್ತು ವಿಶ್ವ ಚಾಂಪಿಯನ್‌ ಫ್ರಾನ್ಸ್‌ ನಡುವಿನ ನ್ಯಾಶನಲ್‌ ಲೀಗ್‌ ಫ‌ುಟ್‌ಬಾಲ್‌ ಹಣಾಹಣಿಯಲ್ಲಿ ಮಿಡ್‌ಫಿàಲ್ಡರ್‌ ಎನ್‌ ಗೋಲೋ ಕಾಂಟೆ ಗೆಲುವಿನ ರೂವಾರಿಯಾಗಿ ಮೂಡಿಬಂದಿದ್ದಾರೆ. ಪಂದ್ಯದ ಏಕೈಕ ಗೋಲು ಬಾರಿಸಿದ ಅವರು ಆತಿಥೇಯ ಪೋರ್ಚುಗಲ್‌ಗೆ
ಸೋಲಿನೇಟು ನೀಡಿದ್ದಾರೆ. ಫ್ರಾನ್ಸ್‌ “ಗ್ರೂಪ್‌ 3′ ವಿಭಾಗದ ಅಗ್ರಸ್ಥಾನಿಯಾಗಿ “ಫೈನಲ್‌ ಆಫ್ ಫೋರ್‌’ ಸುತ್ತು ಪ್ರವೇಶಿಸಿದೆ.

ಆತಿಥೇಯ ನಾಡಿನ ಅಭಿ ಮಾನಿಗಳ ಅಪಾರ ಬೆಂಬಲ ಪಡೆದು ಹೋರಾಡಿದರೂ ಹಾಲಿ ಚಾಂಪಿಯನ್‌ ಪೋರ್ಚುಗಲ್‌ಗೆ ಗೆಲುವಿನ ಮುಖ ಕಾಣಲಾಗಲಿಲ್ಲ. 54ನೇ ನಿಮಿಷದಲ್ಲಿ ಎದುರಾಳಿ ಗೋಲ್‌ ಕೀಪರ್‌ ರೂಯಿ ಪ್ಯಾಟ್ರಿಕೊ ಅವರನ್ನು ವಂಚಿಸುವಲ್ಲಿ ಯಶಸ್ವಿಯಾದ ಕಾಂಟೆ ಚೆಂಡನ್ನು ಗೋಲು ಪೆಟ್ಟಿಗೆಗೆ ತಳ್ಳುವಲ್ಲಿ ಯಶಸ್ವಿಯಾದರು. ಇದರೊಂದಿಗೆ ಪ್ರಶಸ್ತಿ ಉಳಿಸಿಕೊಳ್ಳುವ ಪೋರ್ಚು ಗಲ್‌ ಯೋಜನೆಗೆ ಭಾರೀ ಹೊಡೆತ ಬಿತ್ತು. ಕಳೆದ ವರ್ಷದ ಚೊಚ್ಚಲ ನ್ಯಾಶನಲ್‌ ಲೀಗ್‌ನಲ್ಲಿ ಪೋರ್ಚುಗಲ್‌ ಚಾಂಪಿಯನ್‌ ಆಗಿ ಹೊರಹೊಮ್ಮಿತ್ತು.

ಇದು 44ನೇ ಪಂದ್ಯದಲ್ಲಿ ಕಾಂಟೆ ಬಾರಿಸಿದ ಎರಡನೇ ಅಂತಾ ರಾಷ್ಟ್ರೀಯ ಗೋಲಾಗಿದೆ. ಅವರ ಮೊದಲ ಗೋಲು 2016ರಷ್ಟು ಹಿಂದೆ ರಶ್ಯ ಎದುರಿನ ಸೌಹಾರ್ದ ಪಂದ್ಯವೊಂದರಲ್ಲಿ ಸಿಡಿದಿತ್ತು.

ಜರ್ಮನಿಗೆ 3-1 ಜಯ
ಲೀಪ್‌ಝಿಗ್‌ನಲ್ಲಿ ನಡೆದ ಇನ್ನೊಂದು ಪಂದ್ಯದಲ್ಲಿ ಆತಿಥೇಯ ಜರ್ಮನಿ 3-1 ಗೋಲುಗಳಿಂದ ಉಕ್ರೇನ್‌ಗೆ ಸೋಲುಣಿಸಿತು. ಶುಕ್ರವಾರ ಉಕ್ರೇನಿನ 3 ಆಟಗಾರರಿಗೆ ಹಾಗೂ ಮತ್ತೋರ್ವ ಸದಸ್ಯನಿಗೆ ಕೋವಿಡ್‌-19 ಸೋಂಕು ತಗುಲಿದ್ದರಿಂದ ಈ ಪಂದ್ಯ ನಡೆಯುವುದೇ ಅನುಮಾನವಿತ್ತು. ಬಳಿಕ ಉಳಿದ ಸದಸ್ಯರೆಲ್ಲರಿಗೂ ಶನಿವಾರ ಇನ್ನೊಂದು ಸುತ್ತಿನ ಕೋವಿಡ್‌ ಟೆಸ್ಟ್‌ ಮಾಡಲಾಯಿತು. ಇಲ್ಲಿ ಎಲ್ಲರ ಫ‌ಲಿತಾಂಶ ನೆಗೆಟಿವ್‌ ಬಂದುದರಿಂದ ಉಕ್ರೇನ್‌ ಆಡಲು ಸಾಧ್ಯವಾಯಿತು. ಆದರೆ ಅದು ನಿರೀಕ್ಷಿತ ಹೋರಾಟ ತೋರುವಲ್ಲಿ ವಿಫ‌ಲವಾಯಿತು.