ರಾಷ್ಟ್ರಮಟ್ಟದ ವಾಲಿಬಾಲ್‌: ಕೇರಳ ಕ್ವಾರ್ಟರ್‌ಫೈನಲಿಗೆ

Team Udayavani, Jan 12, 2017, 3:45 AM IST

ಬೆಳ್ತಂಗಡಿ: ಉಜಿರೆಯ ರತ್ನವರ್ಮ ಹೆಗ್ಗಡೆ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ರಾಷ್ಟ್ರಮಟ್ಟದ ಪದವಿಪೂರ್ವ ಕಾಲೇಜುಗಳ ಬಾಲಕಿಯರ ವಾಲಿಬಾಲ್‌ ಪಂದ್ಯಾಟದಲ್ಲಿ  ಕೇರಳ, ತಮಿಳುನಾಡು, ಹರಿಯಾಣ, ಪಶ್ಚಿಮ ಬಂಗಾಲ, ಉತ್ತರ ಪ್ರದೇಶ, ತಂಡಗಳು ತಮ್ಮ ಎದುರಾಳಿಯೆದುರು ವಿಜಯ ಸಾಧಿಸಿ  ಕ್ವಾರ್ಟರ್‌ಫೈನಲ್‌ ಹಂತವನ್ನು ಪ್ರವೇಶಿಸಿವೆ.

ಉತ್ತರ ಪ್ರದೇಶ ತಂಡ ದಿಲ್ಲಿ ತಂಡವನ್ನು ನೇರ ಸೆಟ್‌ಗಳಲ್ಲಿ ಸೋಲಿಸಿ ಲೀಗ್‌ ಹಂತದಲ್ಲಿ ಅಜೇಯವಾಗಿ ಕ್ವಾರ್ಟರ್‌ ಫೈನಲ್‌ಗೆ ಅರ್ಹತೆ ಪಡೆದರೆ, ಕೇರಳ ತಂಡ ಬಲಿಷ್ಠ ಪಂಜಾಬ್‌ ತಂಡವನ್ನು ನೇರ ಸೆಟ್‌ಗಳಲ್ಲಿ ಮಣಿಸಿ ಮುಂದಿನ ಹಂತಕ್ಕೆ ಅರ್ಹತೆಯನ್ನು ಪಡೆದುಕೊಂಡಿತು.

ಹರಿಯಾಣ ತಂಡ ಮಧ್ಯಪ್ರದೇಶ ತಂಡವನ್ನು ನೇರ ಸೆಟ್‌ಗಳಲ್ಲಿ ಮಣಿಸಿ ಮುಂದಿನ ಹಂತಕ್ಕೇರಿದ್ದರೆ ಪಶ್ಚಿಮ ಬಂಗಾಲ ತಂಡ ಝಾರ್ಖಂಡ್‌ ತಂಡವನ್ನು ಮಣಿಸಿ ಎಂಟರ ಸುತ್ತಿಗೇರಿದೆ. ತಮಿಳುನಾಡು ತಂಡ ಗುಜರಾತ್‌ ತಂಡವನ್ನು 3-1 ಸೆಟ್‌ಗಳಲ್ಲಿ ಸೋಲಿಸಿ ಅಂತಿಮ ಎಂಟರ ಹಂತದಲ್ಲಿ ಆಡುವ ಅರ್ಹತೆಯನ್ನು ಪಡೆದುಕೊಂಡಿದೆ.

ಇಂದು ಸಮಾರೋಪ: ವಾಲಿಬಾಲ್‌ ಪಂದ್ಯಾಟದ ಸಮಾರೋಪ ಸಮಾರಂಭ ಗುರುವಾರ ರಾತ್ರಿ 8 ಗಂಟೆಗೆ ಎಸ್‌. ಪ್ರಭಾಕರ್‌, ಕ್ಯಾ| ಗಣೇಶ್‌ ಕಾರ್ಣಿಕ್‌, ಶ್ರೇಯಸ್‌ ಕುಮಾರ್‌ ಉಪಸ್ಥಿತಿಯಲ್ಲಿ ನಡೆಯಲಿದೆ.