ದ್ವಿತೀಯ ಟೆಸ್ಟ್‌: ಮೇಲುಗೈ ಸಾಧಿಸಿದ ದಕ್ಷಿಣ ಆಫ್ರಿಕಾ

Team Udayavani, Feb 26, 2022, 11:19 PM IST

ಕ್ರೈಸ್ಟ್‌ಚರ್ಚ್‌: ಆತಿಥೇಯ ನ್ಯೂಜಿಲ್ಯಾಂಡ್‌ ಎದುರಿನ ದ್ವಿತೀಯ ಟೆಸ್ಟ್‌ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ಮೇಲುಗೈ ಸಾಧಿಸಿದೆ. ಹರಿಣಗಳ 364ರ ಮೊತ್ತಕ್ಕೆ ಉತ್ತರ ನೀಡುತ್ತಿರುವ ಕಿವೀಸ್‌ ದ್ವಿತೀಯ ದಿನದಾಟದ ಅಂತ್ಯಕ್ಕೆ 5 ವಿಕೆಟಿಗೆ 157 ರನ್‌ ಮಾಡಿದೆ.

ವೇಗಿಗಳಾದ ರಬಾಡ ಮತ್ತು ಮಾರ್ಕೊ ಜಾನ್ಸೆನ್‌ ಘಾತಕ ದಾಳಿ ಸಂಘಟಿಸಿದರು. 91 ರನ್‌ ಆಗುವಷ್ಟರಲ್ಲಿ 5 ವಿಕೆಟ್‌ ಉರುಳಿತು. ಆದರೆ ಕಾಲಿನ್‌ ಡಿ ಗ್ರ್ಯಾಂಡ್‌ಹೋಮ್‌ (ಬ್ಯಾಟಿಂಗ್‌ 54) ಮತ್ತು ಡ್ಯಾರಿಲ್‌ ಮಿಚೆಲ್‌ (ಬ್ಯಾಟಿಂಗ್‌ 29) ಸೇರಿಕೊಂಡು ಕುಸಿತಕ್ಕೆ ತಡೆಯೊಡ್ಡಿದರು. ಬಿರುಸಿನ ಆಟಕ್ಕಿಳಿದ ಗ್ರ್ಯಾಂಡ್‌ಹೋಮ್‌ 7 ಬೌಂಡರಿ, 2 ಸಿಕ್ಸರ್‌ ಸಿಡಿಸಿದ್ದಾರೆ.

ಓಪನರ್‌ ಸರೆಲ್‌ ಇರ್ವೀ ಬಾರಿಸಿದ ಚೊಚ್ಚಲ ಶತಕದ ನೆರವಿನಿಂದ ದಕ್ಷಿಣ ಆಫ್ರಿಕಾ ಮೊದಲ ದಿನದಾಟದಲ್ಲಿ 3 ವಿಕೆಟಿಗೆ 238 ರನ್‌ ಗಳಿಸಿತ್ತು. ಇರ್ವೀ ಕೊಡುಗೆ 108 ರನ್‌.