ವೈಟ್‌ವಾಶ್‌ ತಪ್ಪಿಸಿಕೊಂಡ ಮಿಥಾಲಿ ಪಡೆ

Team Udayavani, Feb 25, 2022, 6:50 AM IST

ಕ್ವೀನ್ಸ್‌ಟೌನ್‌ (ನ್ಯೂಜಿಲ್ಯಾಂಡ್‌): ನ್ಯೂಜಿಲ್ಯಾಂಡ್‌ ಎದುರಿನ 5ನೇ ಹಾಗೂ ಅಂತಿಮ ಏಕದಿನ ಪಂದ್ಯವನ್ನು ದಿಟ್ಟ ಚೇಸಿಂಗ್‌ ಮೂಲಕ ಗೆದ್ದ ಭಾರತದ ವನಿತೆಯರು ವೈಟ್‌ವಾಶ್‌ ಅವಮಾನದಿಂದ ಪಾರಾಗಿದ್ದಾರೆ.

ಏಕೈಕ ಟಿ20 ಹಾಗೂ ಸತತ 4 ಏಕದಿನ ಪಂದ್ಯಗಳನ್ನು ಸೋತು ತೀವ್ರ ಮುಖಭಂಗ ಅನುಭವಿಸಿದ್ದ ಮಿಥಾಲಿ ಪಡೆ ಗುರುವಾರದ ಮುಖಾಮುಖಿಯನ್ನು 6 ವಿಕೆಟ್‌ಗಳಿಂದ ಅಧಿಕಾರಯುತವಾಗಿ ಗೆದ್ದಿತು. ನ್ಯೂಜಿಲ್ಯಾಂಡ್‌ 9ಕ್ಕೆ 251 ರನ್‌ ಗಳಿಸಿ ಸವಾಲೊಡ್ಡಿದರೆ, ಭಾರತ 46 ಓವರ್‌ಗಳಲ್ಲಿ ನಾಲ್ಕೇ ವಿಕೆಟ್‌ ನಷ್ಟದಲ್ಲಿ 255 ರನ್‌ ಬಾರಿಸಿತು. ಆರಂಭಿಕ ಆಟಗಾರ್ತಿ ಸ್ಮತಿ ಮಂಧನಾ 71, ತೀವ್ರ ರನ್‌ ಬರಗಾಲದಲ್ಲಿದ್ದ ಹರ್ಮನ್‌ಪ್ರೀತ್‌ ಕೌರ್‌ 63 ಹಾಗೂ ನಾಯಕಿ ಮಿಥಾಲಿ ರಾಜ್‌ ಅಜೇಯ 57 ರನ್‌ ಬಾರಿಸಿ ತಂಡವನ್ನು ದಡ ಸೇರಿಸಿದರು. ಇದರೊಂದಿಗೆ ಮುಂದಿನ ತಿಂಗಳ ವಿಶ್ವಕಪ್‌ ಟೂರ್ನಿಗೆ ಭಾರತ ತಂಡ ಒಂದಿಷ್ಟು ಆತ್ಮವಿಶ್ವಾಸ ಗಳಿಸಿತು.