ಇಂಗ್ಲೆಂಡ್ ಗೆ ತವರಿನಲ್ಲಿ ಮುಖಭಂಗ: ಸರಣಿ ಗೆದ್ದು ಬೀಗಿದ ನ್ಯೂಜಿಲ್ಯಾಂಡ್

Team Udayavani, Jun 13, 2021, 4:35 PM IST

ಎಡ್ಜ್ ಬಾಸ್ಟನ್: ಪ್ರವಾಸಿ ನ್ಯೂಜಿಲ್ಯಾಂಡ್ ವಿರುದ್ದದ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಹೀನಾಯವಾಗಿ ಸೋತ ಇಂಗ್ಲೆಂಡ್ ತಂಡ ತವರಿನಲ್ಲೇ ಮುಖಭಂಗ ಅನುಭವಿಸಿದೆ. ಇದರೊಂದಿಗೆ ನ್ಯೂಜಿಲ್ಯಾಂಡ್ ತಂಡ ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್ ಫೈನಲ್ ಗೆ ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿದೆ.

ಮೊದಲ ಇನ್ನಿಂಗ್ಸ್ ನಲ್ಲಿ 85 ರನ್ ಹಿನ್ನಡೆಯೊಂದಿಗೆ ದ್ವಿತೀಯ ಇನ್ನಿಂಗ್ಸ್ ಆರಂಭಿಸಿದ ರೂಟ್ ಬಳಗ, ಕುಸಿತ ಕಂಡಿತು. 29 ರನ್ ಗಳಿಸಿದ ಮಾರ್ಕ್ ವುಡ್ ಅವರದ್ದೇ ಹೆಚ್ಚಿನ ಗಳಿಕೆ. ಕಿವೀಸ್ ಬೌಲರ್ ಗಳ ದಾಳಿಗೆ ಸಿಲುಕಿದ ಆಂಗ್ಲಾ ಆಟಗಾರರು ಕೇವಲ 122 ರನ್ ಗೆ ಆಲ್ ಔಟ್ ಆದರು.

ಇದನ್ನೂ ಓದಿ:ಕ್ಯಾಪ್ಟನ್ Vs ಕ್ಯಾಪ್ಟನ್ : ಅಭ್ಯಾಸ ಪಂದ್ಯದಲ್ಲಿ ರಾಹುಲ್ ಗೆ ಬೌಲಿಂಗ್ ಮಾಡಿದ ವಿರಾಟ್

ಒಲಿ ಪೋಪ್ 23 ರನ್, ಒಲಿ ಸ್ಟೋನ್ 15 ರನ್ ಮತ್ತು ಜಾಕ್ ಕ್ರಾವ್ಲಿ 17 ರನ್ ಗಳಿಸಿದರು. ಕಿವೀಸ್ ಪರ ಮ್ಯಾಟ್ ಹೆನ್ರಿ ಮತ್ತು ವಾಗ್ನರ್ ತಲಾ ಮೂರು ವಿಕೆಟ್ ಪಡೆದರೆ, ಬೌಲ್ಟ್ ಮತ್ತು ಅಜಾಜ್ ಪಟೇಲ್ ತಲಾ ಎರಡು ವಿಕೆಟ್ ಕಿತ್ತರು.

ಗೆಲುವಿಗೆ 42 ರನ್ ಗುರಿ ಪಡೆದ ಕಿವೀಸ್ ತಂಡ ಎರಡು ವಿಕೆಟ್  ಕಳೆದುಕೊಂಡು ಜಯ ಸಾಧಿಸಿತು. ಹಂಗಾಮಿ ನಾಯಕ ಲ್ಯಾಂತಮ್ ಅಜೇಯ 23 ರನ್ ಬಾರಿಸಿ ತಂಡವನ್ನು ಗೆಲುವಿನ ದಡ ಮುಟ್ಟಿಸಿದರು. ಇದರೊಂದಿಗೆ ಎರಡು ಪಂದ್ಯಗಳ ಸರಣಿಯನ್ನು ಕಿವೀಸ್ 1-0 ಅಂತರದಿಂದ ತನ್ನದಾಗಿಸಿಕೊಂಡಿತು