ಪಿಸಿಬಿ ಜತೆ ಸಭೆ ಬೇಡವಿತ್ತು: ಗೋಯಲ್‌

Team Udayavani, May 31, 2017, 10:40 AM IST

ಹೊಸದಿಲ್ಲಿ:   ಪಾಕಿಸ್ಥಾನ ಕ್ರಿಕೆಟ್‌ ಮಂಡಳಿ (ಪಿಸಿಬಿ) ಜತೆ ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ (ಬಿಸಿಸಿಐ) ಸಭೆ ನಡೆಸುವ ಅಗತ್ಯವೇ ಇರಲಿಲ್ಲ ಎಂದು ಕೇಂದ್ರ ಕ್ರೀಡಾ ಸಚಿವ ವಿಜಯ್‌ ಗೋಯಲ್‌ ತಿಳಿಸಿದ್ದಾರೆ. ಪಾಕಿಸ್ಥಾನದ ಜತೆ ಕ್ರಿಕೆಟ್‌ ಸಾಧ್ಯವಿಲ್ಲವೆನ್ನುವುದು ಬಿಸಿಸಿಐಗೂ ಗೊತ್ತು. ಆದ್ದರಿಂದ ಆ ದೇಶದ ಜತೆ ಸಭೆ ನಡೆಸುವ ಅಗತ್ಯವಾದರೂ ಏನು ಎಂದು ಕೇಳಿದ್ದಾರೆ.

ಬಿಸಿಸಿಐ ಸೋಮವಾರ ಪಾಕಿಸ್ಥಾನ ಕ್ರಿಕೆಟ್‌ ಮಂಡಳಿಯೊಂದಿಗೆ ಕೆಲ ವಿಷಯಗಳಿಗೆ ಸಂಬಂಧಿಸಿದಂತೆ ಮಾತುಕತೆ ನಡೆಸಿತ್ತು. ಇದನ್ನು ಹಿನ್ನೆಲೆಯಾಗಿಟ್ಟುಕೊಂಡು ಗೋಯಲ್‌ ಪ್ರತಿ ಕ್ರಿಯಿಸಿದ್ದಾರೆ. 

ಸೋಮವಾರ ಬಿಸಿಸಿಐ-ಪಿಸಿಬಿ ನಡುವೆ ನಡೆದ ಸಭೆ ಯಾವುದೇ ನಿರ್ದಿಷ್ಟ ತೀರ್ಮಾನಕ್ಕೆ ಬರಲು ವಿಫ‌ಲವಾಗಿದೆ. ಹಿಂದೆ ಬಿಸಿಸಿಐ ಹೇಳಿಕೊಂಡಂತೆ ಅದು ತನ್ನೊಂದಿಗೆ ಕ್ರಿಕೆಟ್‌ ಆಡಿಲ್ಲ. ಆದ್ದರಿಂದ 380 ಕೋಟಿ ರೂ. ಪರಿಹಾರ ನೀಡಬೇಕು ಎಂದು ಪಾಕಿಸ್ಥಾನ ಒತ್ತಾಯಿಸಿತ್ತು. ಇದನ್ನು ಬಿಸಿಸಿಐ ತಿರಸ್ಕರಿಸುವುದರೊಂದಿಗೆ ಮಾತುಕತೆ ಮುರಿದು ಬಿದ್ದಿತ್ತು.